Un’Ufìtziu innovativu de relatas cun su pùblicu chi at a permìtere a is tzitadinos de tènnere informatziones in pagu tempus e intrare in cuntatu cun s’Azienda ispidalera universitària de Casteddu e cun is duos ispidales suos, su Policlìnicu Duilio Casula e su San Giovanni di Dio. Cun custu sistema nou is malàidos ant a pòdere negossiare cun s’Aou de Casteddu cun totus is mèdios a disponimentu: facebook, instagram, twitter, su giassu internet ma fintzas whatsapp, sa posta eletrònica, sa posta eletrònica certificada e su telèfonu.
Su progetu dd’ant presentadu in Casteddu, in su mentres de s’incingiadura de sa sede noa de s’Urp in su Policlìnicu, a ue ant leadu parte s’assessore de sa Sanidade Mario Nieddu, sa retora de s’Universidade de Casteddu Maria Del Zompo e su retore nou Francesco Mola. S’istrutura est in logu tzentrale pro dda bìdere luego intrende e si mustrat acoliosa pro agiudare is malàidos a tènnere una relata de profetu cun is operadores.
Totu is rechestas, in calesisiat manera arribbent, intrant in deretura a intro de unu sistema capassu de donare respustas a lestru. E puru chi no est mai intradu in cuntatu cun s’Aou at a pòdere comunicare cun s’Azienda cun fatzilidade: at a bastare a incuadrare unu de is còdighes qr presentes e in pagu tempus su tzitadinu at a èssere ghiadu in sa prataforma chi preferit.
Cuncordadu gràtzias a una faina cumpartzida de s’Azienda ispidalera-universitària de Casteddu cun duas aziendas de primore de su setore comente a Hootsuite e Alpenite, “su progetu est de importu – at naradu Giorgio Sorrentino, diretore generale de s’Aou- ca permitet de acollire is malàidos e is familiares insoru in sa mègius de is maneras e ddos agiudat a risòlvere is problemas”.
“Fintzas pro ite- at ispricadu Fabrizio Meloni responsàbile Comunicatzione e relatas esternas de s’Azienda – gràtzias a custu sistema nou est s’Ufìtziu chi andat cara a is tzitadinos. Sa tecnologia oe permitet de comunicare mègius donende vida a una relata pari-pari de aficu intra tzitadinos e ente pùblicu”.
Manuela Ennas
