Ammancant pagu prus de duas cidas po torrai a scola pustis de sa serrada po su Covid-19 e funt torrendi a cumentzai sa timoria po s’aumentu de s’impestu e is polèmicas po s’aprontamentu de s’annu scolàsticu nou. In custa istadi totu is novas lòmpias de su ministeru a s’Istrutzioni pùbrica no ant scìpiu donai seguresa a is dotzentis e a is famìllias e a oi sa lìnia inditada lassat prus dudas che àteru. E duncas, mancai sa tarea siat sa de biri totu is studiantis in scola e su setori siat traballendi po lompi a custu arresurtau no si podit fai de mancu de torrai a chistionai puru de didàtica a distàntzia (Dad) alternada e in agiudu a sa didàtica traditzionali o pròpiu in càmbiu. A pitzus de sa Dad funt medas is polèmicas chi ant pesau e no totus dd’iant a agradessi, chi fessit de depi torrai a serrai sa scola po su coronavirus; ma in su mentris no arresurtant àteras solutzionis po binci custas dificurtadis e assegurai sa didàtica.
Craru chi s’impreu de is tecnologias no at a podi surrogai mai su valori de sa scola traditzionali, ca eus cumprèndiu beni po mori de custa esperièntzia cantu contant sa sotzialidadi e is relatas, ma est de importu a pigai su bonu de custa sperimentatzioni e a dda tenni in consìderu po metodologias e progetus nous faci a s’innovatzioni. Tocat a nai puru chi mancai s’arreselu, sa Dad at donau puru arresurtaus profetosus chi si dda faint biri cun àterus ogus. Un’esèmpiu de comenti apat funtzionau beni ddu podeus agatai in una faina chi ant cuncordau is studiantis de sa primu classi, setzioni F-L, de s’Istitutu Marconi-Lussu de Santu ‘Èngiu. Cun su permissu de sa dirigidora scolàstica Vincenza Pisanu e ghiaus de is professoris insoru Giuliana Curreli, Laura Usai e Martino Contu is piciocheddus, in su mentris de sa Dad, ant scritu “Cinque fiabe per caso e un racconto per nulla” unu lìburu, imprentau de su “Centro studi Sea” de Biddaxidru, cun cincu paristòrias modernas e unu contu stòricu, totus imbentaus de issus, innui ant ammostau de ai scìpiu traballai impari mancai sa distàntzia.
Custu progetu cumpartziu antzis, a cantu narant is piciocheddus, ddus at aunius de prus e at afortiau s’amigàntzia in unu mamentu aici difìtzili comenti su chi fiant bivendi, acorraus in domu po nexi de su Covid-19. Is studiantis, po mori de su programma de italianu, de stòria e geografia ant scìpiu manixai is tènnicas de cumponimentu donendi vida a un’òbera de imbentu, ponendi impari sa stòria, sa mitologia e su tempus de oi ma castiendi a su benidori. E aici is protagonistas si movint in mesu a is chistionis de is giòvanus de oi, intra de elementus de sa traditzioni e de sa modernadi, annescendi a si ndi scabulli, a bortas cun s’agiudu se sa maja, e lompi a s’acabbu a una sorti mellus. Cun linguàgiu schetu e sentidus sintzillus custus piciocheddus intritzant is fainas cun sa dimensioni fitiana insoru, ammostendi-sì comenti una matèria scolàstica potzat essi unu jenna po brintai in su mundu de is giòvanus, po ddus connosci mellus, ddus cumprendi e apretziai is capatzidadis e sa fortza chi tenint po afrontai sa vida. Unu progetu duncas chi at coniugau is trastus tecnològicus cun is matèrias traditzionalis po donai boxi a una classi chi no s’est bòfia firmai po curpa de su Covid e at sceberau de mudai in bellu totu su malu de essi privaus de sa scola. Aici totus!
Manuela Ennas
