Sendi chi ocannu, pro curpa de s’epidemia de su Covid-19, b’at pagu seguresa po is fèrias is espertos de su setore ant sebestadu duos mollos de isvilupu pro su turismu. Pro su chi pertocat s’Itàlia, a pustis de custos meses de acorru, sa cosa de importu pro una vacàntzia diat pàrrere sa voluntade de is turistas de torrare a iscobèrrere sa naturalesa. De seguru s’enoturismu, unu turismu pensadu a intro de su mundu de su binu, podet acrobare s’istare in logu abertu cun su màndigu bonu donende a su turista sa possibilidade de si pasiare e de gosare de un’ambienti acoliosu.
Sa cuarantena at impostu ritmos de vida e règulas noos, ma non at istudadu sa gana de chircare calidade cando est s’ora de cuncordare is fèrias e biagiare. Su Movimentu Turismu de su binu (http://www.movimentoturismovino.it) pro respùndere a sa dimanda semper prus manna de is turistas at aparitzadu fintzas unu Protocollu cun sa tarea de fàghere de ghia a is cantinas e a is operadores de s’enoturismu pro adecuare is istruturas e is servìtzios de acasàgiu dende prus atentu a sa cura e a s’amparu de sa salude de is personas. Unu Protocollu chi però at a tocare de averiguare e adatare a is normas de is regionis e de su territòriu de ogni cantina cun indicos chi pertocant is aparauladuras, s’acasàgiu de su turista, is disponimentos e is modalidades de intrada, sa manera de tastare su mandiari, is racumandatziones pro chi donat su servìtziu, s’organizatzione de is bìsitas ghiadas in cantina, sa gestione de sa butega de su binu e sa seguresa de totu is traballadores.
Naramus chi s’enoturismu tenet totu is caraterìsticas chi serbint pro torrare a cumintzare a pustis de custa serrada gràtzias fintzas a percursos capassos de pònnere in pare su paesàgiu cun sa richesa enològica chi donant identidade a unu territòriu; difatis in is caminos istudiados a posta, chi portant a is logos de orìgine de is binos prus pretziados, faghet a bìdere is bingias dae acanta e a tastare is etichetas de sa zona in cue etotu, intrende in relata con totu su chi ddoe at a palas de custa cultura. Sa bìngia aici si mudat casi in unu tzentru culturale in ue su binu est su motore de un’esperièntzia de is sensos. In Sardigna puru sunt prus de binti is cantinas chi pigant parte a su progetu de su Movimentu Turismu de su binu (Argiolas, Audarya, Cantina Antonella Corda, Cantine Aru, Cantina Berritta, Cantine di Dolianova, Cantina di Dorgali, Cantina Lilliu, Cantine Su’entu, Contini, Nuraghe Cabrioni, Olianas, Pala, Poderi Parpinello, Sella & Mosca, Tenute Costadoria, Tenuta Muscazega, Tenute Olbios, Tenute Pili, Tenute Soletta e Vigne Surrau) proponende atividades a s’iscoberta de sa bellesa istòrica e naturalìstica pro promòvere sa cultura de su binu pro mèdiu de is bìsitas in is logos de produtzione e aberrende una ventana noa de promotzione turìstica de totu s’ìsula.
Manuela Ennas
