Torrat Enzo Favata cun una faina noa “The Crossing”, est a nai un’atraessamentu, casi unu brìnchidu in su tempus, de su jazz prog de is annus Setanta a dì de oi cun tastieras e riff eletrònicus, totu ammesturau a pari po lompi a sonus originalis e prus modernus.
“The Crossing” est fintzas su nòmini de sa truma noa chi tenia in conca de cuncordai de meda – at spricau su jazzista sardu. Po iscriri e imbentai sa mùsica fintzas cun s’eletrònica, tenia abbisòngiu de agatai artistas chi tenessint una manera noa de manixai is materialis musicalis, jazzistas lìberus e espertus de custu generi musicali e de àterus linguàgius. S’echilìbriu e sa manera de si dda intendi chi ndi funt bessius a pillu a pustis de is cuntzertus fatus impari at donau vida a custus sonus nous, chi arribant crarus de su palcu a chini s’ascurtat”.
Difatis su discu nou lompit a pustis de duus annus de cuntzertus in Giapone, Inghilterra, Àsia, Sud Amèrica e in su 2020 in Itàlia. Est in su mentris de custas esibitzionis chi Favata at sceberau de pesai sa truma cun is musicistas Pasquale Mirra a su vibràfonu marimba midi, Marco Frattini a sa bateria e a is percussionis e Rosa Brunello a su bassu e contrabbassu.
In su traballu Favata at circau de apoderai cussas chi in inglesu ddis naraus “good vibrations” chi agataus in is cuntzertus, portendi-ddas in stùdiu candu dd’ant arregistrau. “Apu detzìdiu de giai a su discu un’atmosfera comenti chi fessimus in cuntzertu – at aciuntu Favata –,passendi in stùdiu sceti po melliorai sa cosa, po aciungi calchi arrangiamentu cun tastieras analògicas chi ant antimau sa mùsica de is annus ’70. De custus branus cuàturu ddus eus arregistraus in s’istadi passada pròpiu in Itàlia”.
A s’album ant pigau parti puru àterus artistas chi Favata at atobiau in is cuntzertus suus. “Apu collaborau cun genti spantosa comenti a Salvatore Maiore, Marcello Peghin, Maria Vicentini, Ilaria Pilar Patassini e Zhan Qian, un’artista tzinesa virtuosa de su guzheng, ca impari a issa apu tentu sa sorti de sonai in Tzina”.
Manuela Ennas
