Immoi chi est lòmpiu s’annu nou e si podeus nai chi sa rubrica Lapis at a sighiri puru po su 2021 boleus fai is norabonas a totu is chi tenint praxeri de si sighiri a ligi, a is chi tenint a coru su sardu, e a totu is àterus puru ca po is festas seus prus cumpraxentis e s’intendeus in paxi cun su mundu. E insaras norabonas a fillus nostus e a totu is pipius chi funt su benidori e chi teneus su doveri de amparai in dònnia manera. Norabonas a totu is mannus, pruschetotu a is ajajus e ajajas, chi funt s’iscusòrgiu e sa prus memoria berdadera de sa terra nosta. Chena de essi improseris is augùrius ddus faeus fintzas a is polìticus, de dònnia colori e de dònnia genia, po chi s’arregordint de essi amministradoris comenti si spetat de custa ìsula, po chi dda scìpiant avalorai cun arrispetu portendi melliorias e firmendi is tribulias…Ca sa Sardìnnia est su logu innui biveus, innui eus sceberau de abarrai e iat a tocai a dda contivigiai totus impari e mancai chena de meris, ca gei nd’eus tentus medas in sa stòria e forsis est ora de dd’acabbai. E is norabonas duncas ddas faeus a is sardus e a is chi s’intendint sardus, ca no serbit unu passaportu o una punta de billetu po ddu nai o po fai a sfida a chi est prus sardu de s’àteru comenti chi su essi sardus siat un’eticheta de s’apicigai in fronti po ddu fai sciri in deretura. O invècias siat una cosa de cuai, ca est bregùngia. Bregùngia est a stroci is sardus e ddus ghetai a tontus. Bregùngia est a dispretzai sa terra e su traballu de s’òmini e duncas norabonas a is pastoris e a is messajus nostus, chi ddis torrint dinnidadi e stima sintzilla.
Norabonas a is navis, a is aparèchius, a is trenus e a is veturas chi portant is sardus in terra allena, chi siat po abbisòngiu o po praxeri, bastat chi potzant sighiri a si ponni in relata cun is àterus pòpulus de su mundu, invècias de si lassai assolaus e scarèscius in unu furrungoni. Norabonas a is chi donant unu giudìtziu po totu, po chi ndi bessant de is turris de marfìliu insoru e s’ammesturint a sa genti chi mancai sballiendi punnat a fraigai unu mundu mellus. Ca est fàtzili a movi crìticas aberrendi sètzius in domu o cuaus a palas de unu schermu e de una tastiera. Norabonas a su mundu de sa scola, chi ocannu at tentu dificurtadis mannas po assegurai sa didàtica a is studiantis, po chi sigat a essi una luxi in s’annèstriu de is generatzionis noas. Norabonas a su mari, chi potzat abarrai lìmpiu e chena muntonis de àliga chi nci ghetant dònnia annu. Norabonas a sa terra e a is costeras po chi no patant incuinamentu e sfrutamentu. Norabonas a totu is operadoris chi depint donai cunsolu me is oras tristas agiudendi chi sunfrit a no si lassai binci de su dolori. Norabonas a chi est abarrau a solu e ddi parit de no tenni prus nudda in sa vida, po chi potzant agatai ancora cumpangia e sentidus bonus me is àterus. Pruschetotu norabonas a totu is malàdius chi gherrant dònnia dì po sa saludi, e norabonas a is dotoris, is infermieris, is operadoris sanitàrius e is volontàrius chi ocannu ant tentu unu rolu de importu in sa batalla contras a su Coronavirus, e ancora nd’ant a tenni de fai ponendi in perìgulu sa vida insoru po sarvai sa nosta.
Norabonas a totu is cullegas giornalistas e a chi traballat in su mundu de s’informatzioni, po chi potzant sighiri a contai sa beridadi chena de timmi repicas o cadenas po sa libertadi insoru. Deu creu chi sa lista siat ancora longa meda, ma is norabonas funt po totus is chi no seu arremonendi puru. E s’augùriu prus mannu est po nosu, po provai a essi nosu personas mellus ca s’Annu nou, a solu, podit fai pagu e nudda.
Manuela Ennas
