A s’acabbu de una cida arrica de atòbius literaràrius e culturalis s’est cumprida, sàbadu su 25 de cabudanni, sa tzerimònia de premiatzioni de su Prèmiu literàriu Giuseppe Dessì. Lòmpiu a sa de trintases editzionis, nointames is arrègulas po nexi de su Covid, su Prèmiu at ammostau de no nd’ai sunfriu e no teneus dudas de s’arrennèscia sua. Po chistionis organizativas, sa tzerimònia no s’est acumprida in sa Pratza de su Munitzìpiu, comenti est acuntèssiu in sa majoria de is àteras editzionis, ma in sa palestra de is scolas de bia Statzioni, chena de perdi nointames sa maja e is sentidus chi de sèmpiri acumpàngiant su mamentu de custu areconnoscimentu. Sa premiatzioni dd’at ghiada, cun s’ironia sua chi connosceus beni, Neri Marcorè, acumpangiau de is sonus de su duetu Fantafolk, Andrea Pisu a is launeddas e Vanni Masala a s’organetu, e de is boxis de is atoris Emilia Agnesa e Giacomo Casti, chi ant lìgiu carchi pàgina de is òberas bincidoras. Ant portau is saludus insoru sa sindiga a Marta Cabriolu, chi at fueddau de comenti sa cultura siat e depat sighiri a essi a su tzentru de sa vida de sa bidda, de sa comunidadi e de totu su territòriu acanta, Marianna Orrù in rapresentàntzia de Fondazione di Sardegna e Franco Ghiani in rapresentàntzia de s’assessorau a sa Cultura de sa Regioni Sardìnnia. Paolo Lusci, presidenti de sa Fondazione Dessì e cumponenti de sa giuria, at bòfiu arregordai duus amigus e collaboradoris chi no nci funt prus, chi ant donau un’agiudu mannu, de fundamentu, po fai mannu su Prèmiu in is annus passaus, Leandro Muoni e Massimo Murgia: “Si seus innoi oi – at nau – est ca àterus ant traballau meda, cun aficu, prima de nosu”.
In su palcu funt artziaus totu is chi funt lòmpius a sa finali de is setzionis Poesia e Narrativa. Po sa Poesia, Franca Mancinelli cun “Tutti gli occhi che ho aperto”, Francesca Mazzotta cun “Gli eroi sono partiti” e Alessandro Rivali cun “La terra di Caino”. Po sa Narrativa Eugenio Baroncelli cun “Libro di furti. 301 vite rubate alla mia”, Marco Belpoliti cun “Pianura” e Antonio Franchini cun “Il vecchio lottatore e altri racconti postemingueiani”. Sa giuria, ghiada de Anna Dolfi e formada de Duilio Caocci, Giuseppe Langella, Giuseppe Lupo, Luigi Mascheroni, Gino Ruozzi, Stefano Salis, Gigliola Sulis e Paolo Lusci, at donau su prèmiu a is “superbincidoris” de is duas setzionis: po sa Poesia, Alessandro Rivali cun s’arregorta imprentada de Mondadori e po sa Narrativa Marco Belpoliti cun su romanzu imprentadu de Einaudi. Auba de su palcu, po arreciri su prèmiu speciali de sa giuria, sa scritora Dacia Maraini, chi at contau de ai connotu sa Sardigna pruschetotu po mori de sa letura de scritoris comenti a Grazia Deledda e Giuseppe Dessì. Su prèmiu speciali de sa Fondazione di Sardegna est andau invècias a su pianista e composidori Nicola Piovani, chi at contau is mamentus prus de importu de su traballu suu , fatu de mùsica e pellìculas tzinematogràficas.
In su mentris de sa tzerimònia, is bincidoris ant arrexonau meda de stili, de ita cosa est e ita pertocat, de s’insoru e de comenti lassit assatus me is òberas e in sa vida; comenti a unu fil rouge at cosiu is fueddus faendi nasci unu scàmbiu artu e fungudu. In contu de stili, su de su Prèmiu Dessì est de seguru fàtzili a arreconnosci e est arreconnotu a livellu natzionali, “Custa cosa– at nau su presidenti Paolo Lusci, si càrrigat de una responsabilidadi manna po s’amparu de una cultura literària berdadera. Su stili de su Prèmiu, si boleus circai de ddu nai in pagus fueddus, ndi benit de su ai sighiu a ponni impari sa profundidadi de is argumetus e de is fainas cun sa simplesa de sa comunicatzioni, apoderendi sèmpiri livellus artus de calidadi ma cumpartzendi-ddus cun su pùblicu e faendi a manera chi pròpiu sa comunidadi s’intendat protagonista de custu progetu”.
Manuela Ennas
