2 milionis, 2 e centumilla, 2 e duxentumilla, 2 e trexentumilla… No, no fiat sa conta de una manifestada aundi donniunu da sparat prus grussa. Fiant diaderus 2 milionis e passa de personas. Sa dì a pustis, luegu is jorronalis e is televisionis a nai ca anti votau in pagus. Eja, fortzis oliant nai ca in pagus anti votau NO. Po si cumprendi, is chi ant votau “EYA” in i-custa consulta, funt meda ma meda de prus de is votus ca anti tentu, postus totus imparis, is partidus “unionistas” in Catalùnnia ne is eletzionis regionalis (https://it.wikipedia.org/wiki/Catalogna#Elezioni_autonome_2012_.28dati_confrontati_con_quelle_del_2010.29 ).
Medas no du scint, ma sa Catalùnnia no abarrat aillargu meda de nosus: est atesu cument’ a s’Italia, prus o mancu. M’hat fatu efetu ca unu amigu indipendentista, ca fiat artziendi issu puru in s’aparèchiu cenabra po andai in Barcelona a su 9N, si pentzada ca fiant 2 oras de bòbidu. A tipu Brussels. Chini pigat sempri cussu bòbidu, sciri beni ca invecis est un’orixedda, prus o mancu.
E insandus xida passada nosus de su Cìrculu Indipendentista “Hugo Chávez” de Casteddu seus artziaus in Catalùnnia, po bivi custa istorica dì de su 9N, po participai e po castiai. Is cumpàngius de su CUP Països Catalans s’anti obertu is domus insoru e s’anti acumpangiau ne is citadis, ne is biddas, ne is cìrculus, ne is bixinaus, e craramenti, su domìnigu, ne is iscolas aundi sa genti est andara a votai. Sa Cup (Candidatura d’Unitat Popular) est una organizadura polìtica “socialista, eco-sostenible, territorialment equilibrat i deslligat de les formes de dominació patriarcals”.
Creu ca si cumprendat beni chentz’ ‘e abisòngiu de tradusi. Sa prima cosa ca apu biu in su Cup, est ca sa giuventudi est sa fortza manna. Giuventudi po nai binti o trint’annus, no corantacincu cument’ a innoi. E sa fortza da umperant po is batallas, no cumenti a innoi po portai votus a polìticus ca funt 30 annus ne is cadiras (cunsilleris, senatoris, Cda de enti, etc). Po chini ndi olit sciri de prus, de is batallas insoru, de su traballu, de sa curtura, de stadu sociali, de municipalidadi, de totu: dus agatais innoi https://cup.cat/
Eus fatu is primas duas disi in giru, i eus atobiau genti meda. Eus atobiau puru medas atrus internatzionalis bènnius cumenti a nosus: bascus, galitzianus, scotzesus, de dònnia logu, fintzas portoricanus e unu deputau argentinu.
In Catalùnnia una cosa da bisi luegu: una cantidadi manna de “arretzas socialis”, po umperai unu fueddu stravanau, ca creu siant sa fortza de sa noa sociedadi catalana. Seu chistionendi de jorronalis, assòtzius de dònnia arratza, movimentus, trumas de batallas localis, rivistas. C’est debatu polìticu po medas chistionis, e meda participatzioni. Ci funt arràdius puru ne is biddas piticas. Totus chistionant catalanu. M’est tocau puru a fai 2 interbistas in arràdius localis, in spanniolu. Po nai ca deu femu s’ùrtimu arribau, ma fiant interessaus a ndi sciri de sa Sardigna, i a sciri ita si cumprendit de sa Catalùnnia, bistu de innoi.
Su domìnigu invecis s’anti portau in giru ne is sègius, ca femus “observadors internacionals”. E seus abarraus spantaus.
Eus bistu òminis e fèminas, bècius e giòvunus, genti diaderus de dònnia edadi, ca contras a su dennegu medievali de su stadu spanniolu, fatu de minàcias e de carrarmaus, si funt postus selenus in fila po esprimi craramenti su chi depiant nai.
Eus bistu coas de duxentus, trexentus metrus e prus in dònnia logu aundi seus stètius, in Barcelona, in Canet de Mar, in Arenys de Mar, in Badalona, in Sant Andreu i finas in Girona, po andai a votai a su referendum. Ca no fiat referendum, ca su stadu spanniolu no oliat. Biast genti in fila po un’ora, duas oras e prus, ma trancuilla.
No eus bistu polìticus in s’intrada de is sègius abetendi a sa genti po di tocai sa manu, o fendi oghixeddus po arregordai de si fai votai. Ma eus biu in foras pipius gioghendi e is mannus atobiendisì.
E no eus bistu scrutadoris pagaus e nominaus de is partidus, ca scieus beni ca su votu in sa citadi nosta balit 30 eurus in certas periferias e 2 disi de traballu in centru (dipendit de su partidu…). Eus biu sceti volontàrius traballendi po su referendum, e fiant corantamilla e prus in totu Catalùnnia. Eus biu postalis de privaus ca si funt postus a traballai po de badas, de domìnigu, po nci portai a votai sa genti manna meda de edadi, aundi is sègius fiant in artziada.
Eus bistu votai is migrantis e is stràngius, ca po votai bastada chi bivessant in Catalùnnia. Ant votau puru medas amigus sardus ca bivint a ingunis. Duncas meda diversu, po cumenti seus acostumaus nosus a biri sa polìtica ca faint a innoi.
Ma imoi is “unionistas” narant ca no balit a nudda custa declarada populari. Ma chini tenit su deretu de nai ca no balit a nudda?
Is “reistas” de su PPE? O is coranta nazistas ca ci fiant in pratza in Barcelona?
O is de su Psoe ca anti nau ca est “inutili” e ca “ci funt probremas prus importantis”, ma chen’ ‘e nai cali funt custus probremas e scarescendisì ca issus tenit responsabilidadi manna in i-cussus probremas?
O fortzis ca podint chistionai is “democraticus” italianus ca acostant is indipendentistas catalanus a is leghistas, dimostrendi de tenni grandu ignoràntzia e malafidi, e prus de totu scarescendisì ca si c’est callincunu ca si depit castiai a su sprigu funt issus ‘e totu, ca is primas (e is peus) leis contras a is migrantis tenint sa firma insoru?
Su referendum, una aina de democratzia dereta, medas (ca si tzerriant defensoris de sa democratzia) biu ca du timint. E timendiddu, du cumbatint. Ma nemus tenit su deretu de nai ca unu pòpulu no tenit su deretu suu de detzidi po iss’ ‘e totu. E, pagu ma seguru, no du tenit certu unu stadu aundi sa tortura est permìtia po lei. E ca tenint ancora su rei, in su 2014.
Fendi unu paragoni de sa Catalùnnia cun sa sociedadi nosta, postu ca si potzat fai essendi ca seus logus meda diversus, potzu nai ca sa diferèntzia manna da fait sa participatzioni populari a is afàrius pùbricus. Ne is ùrtimus annus innoi in Sardigna eus bistu participatzioni manna in certas biddas, in arrespusta a sa fura de sa terra po sa speculatzioni de s’energia, i est una novidadi manna e de importu. Speru ca siat unu sinnu bonu po un’incrasi aundi siant is biddas e is citadis, is comunidadis, a olli detzidi is scioberus de sa polìtica. Custu pentzamu candu femu in Catalùnnia.
Mi nd’abarrat unu bellu arregordu de custas 3 disi passadas in Catalùnnia, e medas amigus nous. Medas de is cumpàngius catalanus si naranta ca custa cosa de dinnanteris, su 9N, sceti cincu annus fait nimancu si da podiant imaginai. Olit nai una cosa sceti: su tempus benidori no est ancora scritu, cumenti narada cuddu ingres.
Micheli, Jacu, Fidelicu
Cìrculu Indipendentista Hugo Chavez
