S’otu de su mesi de làmpadas de su 2001 su Parlamentu europeu e e su Consillu de s’Unioni Europea iant detzìdiu de cuncordai s’“Annu europeu de is lìnguas” po ammanniai sa cuscièntzia a reguardu de su patrimòniu linguìsticu de totu s’Europa.
De insaras, dònnia annu, su 26 de su mesi de cabudanni is Paisus de s’Europa afestant sa “Dì europea de is lìnguas”, po arreconnosci s’importu de s’imparu de is lìnguas e po promovi sa diversidadi linguìstica e culturali comenti oportunidadi de de crèscida personali, de cuncàmbia e de relata intra de is culturas e de is pòpulus. S’Europa tenit difatis una prenda linguìstica manna: 24 funt lìnguas ufitzialis e prus de 60 is comunidadis localis chi fueddant una lìngua regionali o minoritària. Sa Dì dd’ant istituida pruschetotu cun custas tareas:
- Informai sa genti po su chi pertocat s’importu de s’imparu de is lìnguas, ammanniai su stùdiu e s’impreu de is lìnguas po favoressi su plurilinguismu e sa cumpresa intra de is culturas;
- Promovi sa diversidadi linguìstica e culturali de s’Europa, fai a manera de dd’amparai e dda favoressi;
- Incoragiri s’imparu de is lìnguas a dònnia edadi, in scola e foras de sa scola puru, siat po stùdiu, po traballu, po praxeri e po si sciri movi mellus in is paisus.
Cun s’istitutzioni de custa Dì su Consillu de s’Europa punnat a apariciai atòbius e a fai cresci sa sensibilidadi in is polìticus, in is giòvanus, in is traballadoris in is assòtzius chi si ocupant de custu setori.
Su mundu de s’annèstriu e de sa didàtica creit meda in su profetu de su plurilinguismu e custa Dì, avalorendi is lìnguas de bratzolu de is scientis, de is minorias linguìsticas e ètnicas puru, donat valori puru a su deretu de afortiai s’identidadi in sa scola e in sa sotziedadi. Su connosci àteras lìnguas, oi comenti oi, donat prus possibilidadis de agatai traballu, sendi chi is lìnguas funt una risorsa de sfrutai e no prus una làcana chi marcat is distàntzias. Su tenni cumpetèntzias linguìsticas no est sceti una netzessidadi comuni ma unu deretu po totus, capassu de melliorai is cuntatus polìticus, econòmicus e personalis intra de personas de trumas linguìsticas diferentis e capassu de binci s’intolleràntzia e is sentidus de xenofobia.
Me is annus passaus totu is stadus europeus ant cuncordau atòbius po tzelebrai custa Dì, ma ocannu, po nexi de s’emergèntzia sanitària, in su giassu internet https://edl.ecml.at/ nd’arresurtant meda prus pagus. Po sa Sardìnnia sa “Cooperativa Turismo in Marmilla” proponit is bìsitas ghiadas in sardu a su Nuraxi de Genn’e Mari e a su Museu Archeològicu de Biddanoa de Forru, sèmpiri arrispetendi is normas anti-Covid.
Manuela Ennas
