Sighit sa gherra de is Istitutzionis Europeas contra a s’imbrutamentu. Pustis is decisionis chi pertocant is veturas, chi a partiri de s’annu 2035 ant a podi essi sceti elètricas, immoi tocat a is imboddicus de is prodotus. Sa decisioni in contu de veturas at pesau unus cantu de polèmicas poita in medas, spertus et scientziaus puru, si de una parti no funt cumbintus chi potzat serbiri diaderus a minorai s’imbrutamentu, de s’àtera narant chi at a ocasionai de seguru unu problema econòmicu grai, po primu po s’indùstria de is veturas e a sighiri po totu s’economia europea. Is propostas in contu de imboddicus puru ant a pesai polèmicas perou sa Cummissioni Europea proponit, a partiri de su 2030, de smenguai is imboddicus. Sa tarea est cussa de minorai is arrefudus, pruschetotu de pràstica e de paperi. Po sa Cummissioni difatis s’Europa produsit tropus arrefudus, cun unu dannu mannu po s’ambienti, e su mesu po cumbati custu problema est de favoressi cussa chi si nàrat “economia circulari”, est a nai, po dda fai meda simpli, s’impreu de is cosas po prus de una borta. Segundu is stùdius pigaus in consideru de sa Cummissioni, in Europa dònnia citadinu produsit in unu annu casi 180 chilus de arrefudus, una cantidadi manna diaderus chi in prus est crescendi dònnia annu de prus. Chi is autoridadis no ant a fai nudda, narat sa Cummissioni, me is otu annus chi benint is arrefudus de imboddicus ant a cresci de su 19% e a dolu mannu sa pràstica, e seus chistionendi de una de is cosas chi imbrutant de prus, indiritura de su 46%.
Po custa arrexoni sa proposta de Regulamentu fata de sa Cummissioni disponit chi intra de su 2030 asumancu su 20% de totu is bevidas fridas e callentis at a tocai a ddas bendi in tassas e burràscias chi fait a torrai a impreai, ca is clientis ddas ant a depi torrai. De sa tarea de su 20% in su 2030, me is ideas de sa Cummissioni, s’at a depi arribai a su 40% intra de su 2040. Po is locandas invecis sa mira est sceti de su 10% intra de su 2030, po arribai perou a su 40% intra de su 2040. Po totu sa pràstica impreada sa Cummisioni bolit arribai luegu a tenni una cuota de su 30% de materiali torrau a impreai.
Massimiliano Meloni
