Intra de s’acabbu de s’annu su Parlamentu iat a depi nai eja a sa proposta de lei finantziària presentada de su Guvernu. Sa proposta at fatu frungiri su bruncu a medas: a is partidus de s’opositzioni, a is sindacaus (sa CGIL e sa UIL ant fatu sciri chi ant a manifestai contras) e fintzas a Confindustria. De sa finantziària funt medas is cosas chi no praxint, ma una est tenta in consìderu prus de is àteras in dònnia debata polìtica, ca is boxis contràrias funt medas e autorìvilis puru. Seus chistionendi de s’idea de artziai su lìmidi po s’impreu de su dinai in càmbiu e de is pagamentus eletrònicus, est a nai po mesu de su “bancomat”. Po sa majoria de centru-dereta, chi dda teniat in su programma eletorali puru, custa idea punnat a favoressi po primu cosa is butegajus – ca a issus ddis tocat a pagai is operatzionis eletrònicas a is bancas -, pustis chi no tenit dinai bastanti po tenni unu contu in banca e a sa fini puru chi, comenti is prus bècius, no est abistu cun is trastus de pagamentu eletrònicu.
Is chi funt contras a custa idea narant chi unu lìmidi bàsciu serbit a cumbati su sfrosu e is pagamentus illegalis. Me is ùrtimas cidas custu parri, portau a innantis de is opositzionis, dd’ant espressau perou sa Corti de is Contus e sa Banca d’Itàlia puru, e s’importu de is boxis insoru est ponendi deaici in pensamentu sa majoria chi si pensat chi su Guvernu potzat torrai agoa.
Su problema de su sfrosu in Itàlia difatis est grai meda. S’ùrtima nova chi pertocat cust’allega est de cida passada, candu sa Cummissioni Europea at fatu sciri chi in contu de sfrosu de Iva s’Itàlia est su Stadu chi fait peus de is àterus in Europa, cun 26 milliàrdus sfrosaus in su 2020. Una cifra arta diaderus, pensendi chi a palas de s’Itàlia ddoi at sa Frantza cun “sceti” 14 milliàrdus sfrosaus. Su sfrosu in Itàlia perou no pertocat sceti s’Iva ma totu is tassas, cun nùmerus de spantu. Su Ministeru de s’Economia dònnia annu imprentat una relata po ndi torrai scera: cussa prus noa est de s’annu passau e pertocat su 2019. In cuss’annu is Italianus ant sfrosau in totali 86,6,milliàrdus de èurus. Sa tassa prus sfrosada est stètia s’Irpef (32,2 milliàrdus) sighida de s’Iva (27,8 milliàrdus) e de s’Ires (8,17 milliàrdus).
Massimiliano Meloni
