In custa diis de s’annu a sa genti dda ferrit su pensamentu po is arregalus de fai po Paschixedda. Me is retzas socialis e in televisioni est totu unu sciòriu de spertus chi spricant comenti fai arregalus agradèssius, comenti spendi pagu e fintzas ita iat a tocai a fai po no s’amachiai in custu disafiu. Sa cosa chi sarvat medas consumadoris tenit unu nòmini: internet. No est prus su tempus de andai a ingìriu de una butega a s’àtera a circai s’ispiratzioni e de perdi su merì me is centrus cummercialis. Su consumadori abistu si setzit in domu, intrat me is portalitus de su cummèrciu in lìnia, circat, decidit e compurat. Sa cosa lompit a domu e chi no andat beni fait puru a dda torrai. Is prus portalitus mannus donant tempus fintzas a su mesi de friàrgiu po torrai is cosas. Totu custu est meda simpli de fai, mancai parit chi serbant spertus po spricai beni puru comenti compurai in sa retza, comenti stesiai is trampas, comenti pagai in seguresa e totu unu niaxi de àterus consillus utilosus. Làstima chi, compurendi de aici, sa maja de pigai is arregalus de Paschixedda unu pagu si perdit. Ma is chi perdint meda de prus de sa maja funt is butegas fìsicas, chi me is ùrtimus annus sunfrint sèmpiri de prus po sa cuncurrèntzia de su cummèrciu in lìnia. In prus, sa calada de su cummèrciu fìsicu no est sceti unu fenòmenu chi bessit a pillu po Paschixedda, ma oramai pertocat totu s’annu.
Una circa de custas diis de Unioncamere e Infocamere, is assòtzius de is Càmeras de Cummèrciu, amostat cun is nùmerus su chi seus narendi, est a nai chi su cummèrciu fìsicu est sèmpiri prus in dificurtadi. Su setori chi, a cantu parit, sunfrit de prus sa crisi est cussu de s’arroba de bistiri. Sa cuncurrèntzia forti de su cummèrciu in lìnia est sa cunseghèntzia de àteras arrexonis, ca a mudai is avesus de is consumadoris nc’ant pensau prima su Covid cun sa serrada de is butegas e pustis s’inflatzioni cun sa crèscia de is prètzius.
Intra de su 2019 e su 2023 ant serrau sa serranda po sèmpiri prus de noi milla butegas de arroba in totu itàlia. De custas, casi ses milla fiant aziendas individualis. In percentuali, ant serrau s’11% de is butegas, unu nùmeru spantosu. Sa calada at fertu de prus is butegas tentas de fèminas e de giòvunus asuta de is 35 annus. Is primas ant registrau una variatzioni negativa de su 10%, is segundas indiritura de su 26%. Is butegas stràngias puru (su 10% totali de su setori) ant tentu un’àndala negativa ca su 10, 4% ant serrau. Castiendi is nùmerus po regioni, sa regioni chi at tentu prus serradas est su Lazio, chi at pèrdiu 2.376 butegas, sighida de Lombardia (-1.192) e Toscana (-704). Chi arrexonaus invècias apitzus de is percentualis, is regionis cun sa sunfridura prus manna funt Lazio (-22,1%), Marche (-14,1%) e Toscana (-12,8%). Is regionis cun is nùmerus prus piticus de serradas in percentuali invècias funt Campania (-4,9%) e Sicilia (-3,6%).
In Sàrdinnia in su 2019 ddoi fiant 2.256 butegas de arroba, in cincu annus 2.256 ant serrau. S’Ìsula est sa de noi in custa classìfica negativa ca in percentuali at pèrdiu s’11,3% de is butegas de arroba. Sa crèscia de su cummèrciu in lìnia ocannu dd’at afortiada puru sa facilidadi de pagai chi donant is servìtzius Bnpl, un’acrònimu ingresu chi bolit nai “compura immoi e paga prus a tardu”. Po mori de custus servìtzius, chi funt sèmpiri prus spaniaus, fait a pagai a motas (soventi is motas funt tres). Is motas casi sèmpiri funt chena de interessus, duncas su consumadori arrennèsciit a pigai su chi disìgiat chena de pensamentus, pruschetotu in cuddus tempus de s’annu comenti Paschixedda, candu sa genti compura de prus. Un’ammanniada de s’impreu de is servìtzius Bnpl dd’eus bia po su “Black Friday” in su mesi de donniasantu e s’àndala oramai parit custa, a dolu mannu po is butegas fìsicas, chi ddi tocat agatai maneras noas po atirai is burruchianus.
Massimiliano Meloni