Neoneli est in faimentus po ‘Wine, frègula e cassola‘, un’atòbiu enogastronòmicu chi in custu acabbu de cida at a aberri is jennas de sa bidda a is bisitadoris.
S’atòbiu, chi costumànt a fai in is primus diis de mesi de ladàmini, sceti po ocannu su Comunu dd’est cuncordendi po su 20 e 21 de mesi de donniasantu, ca pròpiu in is matessis diis Neoneli est intra de is biddas chi pigant parti a sa de binticincu editzionis de “Monumenti Aperti”.
Sa tarea est de avalorai sa màgini de sa bidda de su Barigadu ammostendi e faendi connosci is prodotus de su logu e is bellasas de su patrìmoniu stòricu e culturali. Sàbudu e domìnigu duncas sa bidda at a acasagiai is bisitadoris in is bixinaus antigus intra de atòbius culturalis, mandiari e binu, piessignus de su programma de custas duas diis.
Sa frègula, genia de pasta de sìmbua de trigu tostu tìpica de sa coxina sarda, at a essi sa protagonista de su domìnigu ca in pratza de Barigadu ddoi at a essi sa de dexi editzionis de sa Fregulada, un’atòbiu chi oramai est su sìmbulu de s’atòngiu in Neoneli, cun ses coxineris in gara chi ant a aprontai mandiari cun frègula; e in prus su pràngiu cun sa frègula istuvada, fata a brodu e incasada, e sa cassola, cun bagna de petza de brebei, traditzionalis de sa coxina de su logu. No ant a mancai tastaduras de binus de 9 cantinas diferentis e mamentus dedicaus a is mùsicas traditzionalis.
Comenti fiaus narendi a comintzu, Neoneli est in su programma de Monumenti Aperti, faina dedicada a s’avaloramentu de is benis culturalis de s’ìsula e no sceti, e duncas po mori de is bìsitas ghiadas, at a fai a gosai de is bellesas de su logu comenti sa crèsia de s’Àngelu, de su de dexaseti sèculus, chi s’agatat in su sartu a tres chilòmetrus de sa bidda, s’Òasi faunìstica de Assai e is “Arcivos”, impiantus antigus po fai su binu chi impreànt in cussus logus e chi serbiant po nci ponni s’àxina primu de dd’acacigai. Po ndi sciri de prus mellus a sighiri su giassu internet de su Comunu e sa pàgina https://www.facebook.com/VisitNeoneli/ .
Manuela Ennas
