Eus giai nau aìnturu de custa rubrica chi is fèminas funt patendi prus de is òminis custa pandemia, ca tenint prus càrrigus de traballu in domu e in sa professioni e in custu tempus de crisi econòmica funt is primas a nci perdi su postu. Su de ammentai sa presèntzia insoru in su mundu de oi podit essi de agiudu po fai cresci sa stima chi issas tenint de sei e sa fortza netzessàrias po sighiri a fai parti de sa sotziedadi in manera ativa e fracòngia.
Duncas su ammostai su contributu de is fèminas, dònnia dì de s’annu e in dònnia setori, pruschetotu a is generatzionis noas, podit agiudai a smenguai is stereòtipus de gèneri,is pregiudìtzius e is cumportamentus sotzialis discriminatòrius; a gherrai is dinàmicas de segregatzioni de gèneri in s’imparu, in sa formatzioni e, de cunsighèntzia, in su mercadu de su traballu; a svilupai su respetu de pipius e òminis po is fèminas. In prus podit favoressi s’ammanniamentu de prospetivas e tareas po is giòvanas, sa circa de cumpetèntzias e professionis cualificadas, sa punna a lompi a incarrigus artus,su coràgiu de afrontai esperièntzias imprenditorialis e sa promotzioni de sa paridadi de gèneri in is protzessus detzisionalis.
In custa àndala e sighendi custu tretu est nàsciu su progetu Calendaria 2021 “Donne per Europa – Femmes pour s’Europe – Women for Europe”, chi bolit donai una visibilidadi fitiana a fèminas chi ant collaborau a ndi pesai sa sotziedadi europea , faendi connosci su rolu e is meressimentus insoru a totu sa comunidadi. Ca est de importu in custu mamentu stòricu difìtzili a afortiai s’identidadi de s’Unioni Europea torrendi a partiri de is sentidus chi dd’ant fundada, lassendi a un’ala is partis e is làcanas polìticas, est a nai paxi, democratzia, solidaridadi, uguagliantza, culturas e cumpartzimentu de idealis e atzionis.
Su progetu Calendària est un’illustratzioni de apicai a su muru, dedicada a 60 fèminas famadas de s’Unioni Europea (duas po dònnia Paisu e tres pro dònnia Paisu fundadori) chi ant lassau un’arrastu de importu in sa stòria. Su calendàriu dd’ant imprentau in tres lìnguas: italianu, frantzesu e inglesu. Dònnia cida est dedicada a una fèmina e po donniuna de issas ddoi at una nota biogràfica cunu unu resumu curtzu de is prus atividadis de importu. Su progetu dd’at cuncordau s’Assòtziu Toponomàstica femminile chi in su mentris de sa serrada po nexi de su Covid, at apariciadu una regorta de dinari po s’imprenta e postu impari una truma de de 13 illustradoras, tradutoras e curadoras de is notas biogràficas e de is contus asuba de is protagonistas.
In mesu de custa fèminas de valori ddoi est fintzas Lianora d e Arbarèe. Gràtzias a s’adesioni de su Comunu de Aristanis in custas diis passadas su progetu est incarrerau cun s’ intregu de is calendàrius a is dirigentis scolàsticus de is stitutus cumprensivus de sa tzitadi.
Difatis s’Assessore a sa Cultura Massimiliano Sanna, paris cun sa referenti locali de su progetu Stefania Carletti, at donau a is dirigentis scolàsticus Carmensita Feltrin, Tiziana Laconi, Giuseppina Loi, Maria Giovanna Pilloni e Pasqualina Saba is calendàrius po totu is classis de is scolas segundàrias de primu gradu de Aristanis chi ant a essi a disponimentu de is studiantis. Po s’8 de martzu s’Assessorau a sa Cultura e Istrutzioni Pùblica at a promovi una cunferèntzia in lìnia cun is scolas , sa presidenti de Toponomàstica femminile Maria Pia Ercolini, is referentis localis de sa faina, su professori Raimondo Zucca e Stefania Carletti po s’ufìtziu de progetatzioni europea de su Comunu, cun su contributu de s’Assessorau a is polìticas sotzialis e de sa Presidenti de sa Cummissioni po sa Paridadi.
In prus de Lianora de Arbarèe, po s’Itàlia ant sceberau Ada Rossi (partigiana nàscia in Emìlia Romagna) e Fausta Deshormes La Valle (nàscia in Campània), chi in su 1977 at fundau su Servìtziu de Informatzioni po is fèminas in sa Cummissioni Europea.
Manuela Ennas
