Is scontus de ierru 2023 in Sardìnnia cumentzant giòbia su 5 de gennàrgiu e ant a sighiri po àteras 60 diis. In àteras regionis de Itàlia funt cumentzaus giai de calchi dii, invècias sa Sardìnnia at sceberau de abetai sa dii innantis de sa Pasca de is tres Urreis. A pustis de unu tempus difìtzili, ca ocannu is tàcias e is pagamentus funt crèscius meda po famìlias e aziendas, sa spera est chi custus scontus potzant essi de profetu a s’economia e potzant torrai unu pagu de sulidu a is butegheris. A nai sa beridadi sinnialis bonus fiant giai lòmpius po Paschixedda, ma is datus de is bèndidas ddus eus a tenni a disponimentu prus a innantis.
Custu tempus de scontu nc’at chi dd’abetat totu s’annu, po circai de sparagnai carchi cosa in contu de bistiris, crapitas ma fintzas trastus e arroba po sa domu. Mancari in is ùrtimus annus siat sèmpiri de prus sa genti chi lassat is bùtegas po sceberai de comporai in lìnia, innui s’agatant cosas prus baratas e chi lompint luegu etotu inderetura a domu, is scontus arrennèsciint sèmpiri a ingendrai interessu fintzas in is prus aorradoris. Is assòtzius de consumadoris, pruschetotu po is scontus, cunsillant sèmpiri de pigai in is butegas, mellus ancora chi funt in bixianu, e donai atentu a su mercadu telemàticu, po no s’agatai in mesu a trampas e frigaduras. Ant a essi 15,4 millionis is famìlias chi s’ant a dedicai a comporai a baratu e dònnia persona at a gastai prus o mancu 133 èurus, po unu giru de afàrius de 4,7 milliardus de èurus: funt custus, segundu is càlculus de s’Ufìtziu Studius de Confcommercio, is nùmerus de is scontus de ierru. Comenti a dònnia annu Confcommèrcio at imprentadu in su giassu internet suu una ghia po cumprendi mellus comenti funtzionant is scontus e connosci calis funt is diferèntzias intra de scontus, bèndidas po sa serrada de una atividadi e promotzionis po unu tempus pretzisu. In prus, in su giassu s’agatant totu is normativas natzionalis chi arrègulant is scontus e is smendas – chi podint cambiai de una regioni a s’àtera – po chi no arrispetat is leis. Funt cincu is prus ìndicus de importu po no arrui in faddina. Ddus bieus:
1) Tocat a s’arregordai chi su càmbiu de is artìculus pigaus in scontu est a discretzioni cumpleta de su butegheri, sèmpiri chi su produtu no apat tentu dannu o no siat cunformi ca asinuncas su butegheri tenit s’òbrigu de aconciai o cambiai sa cosa o, si no fait, de smenguai o torrai cantu pagau. Sa chistioni perou depit bessiri a pillu intra de duus mesis de sa data de sa scoberta de su difetu.
2) No esistit s’òbrigu de mesurai is bestiris in sa butega. Custu puru est a discretzioni de su butegheri.
3) No est berus chi tocat a pagai cun dinai in contanti. Fait a impreai àteras formas de pagamentu comenti su bancomat o cartas de crèditu.
4) Is produtus in bèndida postus in scontu depint tenni caràteri stajonali e depint essi a sa moda. Su prètziu depit essi smenguau meda si no ddus bendint aìnturu unu tzertu perìodu de tempus.
5) Is ìndicus de su prètziu depint essi sèmpiri crarus. Su butegheri tenit s’òbrigu de inditare su prètziu de inghitzu de bèndida, su scontu e su prètziu finali.
In prus su butegheri at a depi assegurai sa distàntzia de unu metru intra de is clientis, fintzas candu funt abetendi de intrai, ponendi in foras unu cartellu cun su nùmeru de clientis chi podint intrai a butega in su matessi mamentu. Is smendas podint lompi candu sa mercantzia in scontu no ammostat s’eticheta de su prètziu, candu is butegas faint scontus foras de de su perìodu sceberau de sa Regioni de apartenèntzia, candu s’arroba in scontu no est partzida de cudda a prètziu intreu, candu is ìndicus e sa publitzidadi no funt sintzillus ma pensaus po improsai su clienti.
Manuela Ennas
