Amus faeddadu in is dies passadas de sa app Immuni, chèrfida dae su Guvernu italianu pro pònnere in sa lerta in tzitadinos chi diant pòdere èssere istados a cuntatu cun su coronavirus, e chi immoe, dae su primu de làmpadas, faghet a iscarrigare (sighende custu ligàmine https://www.immuni.italia.it/download.html ) in is dispositivos Ios e Android, ca su Garante pro sa privacy, sa riservadesa de is datos, at donadu su parre a favore. Pro cumentzare, s’otu de làmpadas, s’isperimentazione at a pertocare bator regiones, est a nàrrere Abrutzu, Ligùria, Marche e Pùglia. Ma abarrant acora aspetos medas de acrarire.
Su Ministru pro s’Innovatzione Tecnològica, Paola Pisano, at pretzisadu chi pro otènnere resurtados tocat chi a impreare s’app siant nessi su 60-70 pro centu de is italianos. Sende unu trastu voluntàriu e cunsiderende chi in Itàlia non totu sa populatzione tenet a pràtiga un’impreu adecuadu de is tzellulares, est ladinu chi su problema de importu, chi at a determinare sa resessida o su fallimentu de s’aplicatzione, at a èssere pròpiu su de segudare custu lìmite de cunsensu. Pro risòlvere custu problema s’est pensende fintzas a fainas pro cumbìnchere sa gente a iscarrigare s’aplicatzione ca nche sunt dudas, parres e novas chi arriscant de minare s’aficu de is italianos in custa solutzione tecnològica chi, essende destinada a unu sèberu voluntàriu, abbisòngiat de un’immàgine imbetzes crara e positiva pro segudare unu resurtadu.
Su chi ponet in pensamentu is italianos est mescamente totu cantu pertocat sa riservadesa de is datos ma
su Ministeru at fatu ischire chi:
– S’aplicatzione no at a atzèdere a sa rubrica de is cuntatos, no at a pedire de connòschere su nùmeru telefònicu de s’impitadore e no at a imbiare Sms pro sa notìfica de is sugetos a arriscu (operatzione chi at a èssere gestida a intro de s’app);
– S’aplicatzione no at a allogare is datos relativos a sa geolocalitzazione de is impitadores, ma at a registrare sceti is cuntatos pro mèdiu de s’identificativu, agatados cun sa tecnologia Bluetooth;
– S’aplicatzione at a èssere gestida in manera intrea dae sugetos pùblicos.
Su Garante pro s’amparu de is datos personales s’est pronuntziadu siat in su mamentu de su sèberu de sa solutzione tecnològica (su 8 de abrile, in auditzione in s’Aposentu de is Deputados), siat pro s’istèrrida de sa normativa chi disciplinat s’introdutzione in Itàlia de su contact tracing tecnològicu (artìculu 6 de su D.L. 28/2020), siat su primu de làmpadas, cun unu provedimentu de anàlisi de s’avaloramentu de efetu frunida dae su Ministeru de sa salude (chi est titulare de su tratamentu) a is sensos de su regulamentu europeu in s’amparu de is datos personales (Gdpr).
In custu ùrtimu provedimentu su Garante, pretzisende chi s’app no est de seguru sa solutzione a s’impestu de su coronavirus, frunit indicos tècnicos tenende a mente duas tareas printzipales: dae un’ala fàghere de manera chi s’aplicatzione bèngiat impreada cun atinamentu, sena de si nde ismentigare chi serbit pro otènnere unu contact tracing ùtile, dae s’àtera ala amparare e tutelare is tzitadinos e sa salude issoro. In prus at pretzisadu chi s’impitadore tocat informadu de sa possibilidade chi s’app potzat ingendrare “farsos positivos”. S’autoridade at pronuntziadu una sèrie de racumandandàntzias chi cherent megiorare s’app e chi ant a dèpere èssere pigadas in càrrigu in antis de su 9 làmpadas, die in ue Immuni at a inghitzare a iscambiare is còdighes identificativos cun is àteros telèfonos in is regiones chi ant naradu eja a s’isperimentatzione (Abrutzu, Ligùria, Marche, Pùglia).
Deaici cumentzat duncas custa fase de su sistema Immuni, registrende giai su primu resurtadu de àere firmadu totu is progetos de contact tracing a livellu locale chi non tenent s’autoritzazione de su garante e duncas non faghet a ddos reconnòschere comente seguros, sende chi tocat a averiguare semper chi siant respetados is òbligos pro su bene non solu de s’utilidade de su sistema ma mescamente, de sa libertade e is deretos de totus.
Manuela Ennas
