Mesi de Idas, tempus de Paschixedda e de festas de passare totus in pare in famìlia. Tando apo pensadu pro s’intervista de oe a unu personàgiu chi partende de is annos sessanta at fatu cumpangia a generatziones de pipios, e de mannos puru, chi fiant acostumados a abarrare a dae in antis a sa televisione imbetzes chi a is telèfonos comente incàpitat como. Issu est unu pupone, de is chi faeddant però, tenet unu naturale durche meda e una boghe delicada. Sa fèmina chi dd’at imbentadu in un’intervista aiat naradu chi sa renèssida incapas fiat acapiada a “su retratu de su candore, de s’ispera in unu mundu mancari fertu de is perìgulos e de is timorias”. Issu, ddu depimus nàrrere, est unu sorigheddu, cun una notzèntzia ispantosa ma fintzas cun un’ispiritu chi nos ammentat cussu disìgiu de carignos pròpiu de is pipios. Portat origras mannas meda, sa cara tundighedda e a colore de rosa, est marrudu, cun is pilos brundos..Emmo, est issu, Topo Gigio.
Salude Topo Gigio! Càstia, t’apo portadu unu pagu de casu dae sa Sardigna ca isco chi ti praghet meda…
Salude a tie! Emmo, mi praghet meda. Non nde potzo fàghere de mancu, a nàrrere sa beridade! E si est sardu, est mègius puru. Mmmm, ite saboridu!
Non ti dd’as a bòllere papare totu immoe, ca mi depes contare unu pagu de tie.
Mi ddu pòngio in su tascapane…Duncas, duncas deo so nàschidu dae s’imbentu de Maria Perego e so lòmpidu in televisione in su 1959. A pustis de un’annu fia giai su protagonista de su programa chi contaiat is aventuras meas, “Le storie di Topo Gigio” de Guido Stagnaro. Ddu donaiant ogni mèrcuris a merie, e luego etotu est acontessida sa renèssida de su personàgiu meu, mescamente intre de is pipios.
Una renèssida chi s’est ammanniada de annu in annu?
Emmo,in su 1961 so istadu su primu pupone animadu a leare parte a su Carosello e in su matessi annu su protagonista de sa pellìcula “Le avventure di Topo Gigio” cun sa regia de Federico Caldura e Luca De Rico. E semper in su 1961 so imbucadu fintzas in su “ Corriere dei Piccoli” cun is pinturas de Dino Battaglia.
Però naramus chi sa domo tua est in sa Rai?
Naramus chi eja, apo pigadu parte a trasmissiones medas de sa RAI. Pro nàrrere so istadu su cumpàngiu de Cino Tortorella in su “Zecchino d’Oro”, unu programma chi ancora oe sighit a incantare is pipios. Apo fintzas presentadu “Canzonissima” in pare a Raffaella Carrà. Apo traballadu fintzas pro Mediaset. Fiat ispassiosu in cue puru, però apo sufridu meda ca pro s’editzione de su “Zecchino d’Oro”de su 2004, sa Rai aiat tzerriadu a Geronimo Stilton pro pigare su postu meu.
Un’àteru sorigheddu?
Sissi, no ddu naro pro issu, ca semus fintzas amigos, ma cussa trasmissione chena de Topo Gigio no est sa matessi cosa.
E a tie ti praghet a cantare puru berus?
A pustis de totu cussu tempus colladu in ie, calchi cosa dd’apo cantada fintzas deo. Una de is prus cantzones famadas fiat “Strapazzami di coccole”, non pro nudda ca a mie is carignos mi praghent meda.
Is amigos tuos chie fiant?
Is amigos meos fiant Ino, su cumpàngiu de aventura mègius chi podere tènnere , e Rosy Rosicchia, prus de un’amiga, naramus s’amorada mea. Ddoe fiat semper cussu Megalo però a nos segare sa conca. Unu pisitu ocasioneri e intzilliadore mi’! Fiat semper ponende avolotu.
Tue as traballadu meda fintzas foras dae s’Itàlia? Sissi, in trasmissiones televisivas de totu su mundu, in Argentina, in Brasile, in Bolìvia, in Colòmbia,in Ecuadòr, in Giapone, in Germània, in Mèssico, in Olanda, in Perù, in Venezuela. Sa lista est longa. Mi cheriant in ogni logu. Apo leadu parte puru a su “The Ed Sullivan Show” de sa CBS, cun sa bellesa de 92 presèntzias. Non mi lassaiant torrare a domo.
Berus est chi ses lòmpidu fintzas in su Caminu de sa Pàgia?
Sissi, piticu s’ispantu. Mi trement is mustatzos a bi torrare a pensare. In Giapone, sa Nippon Animation aiat fatu in su 1988 una sèrie animada pro sa televisione cun 34 episòdios intitulada “Bentornato Topo Gigio”, in ue deo fia su primu sòrighe astronàuta a arribare a in cue.
Tando Topo Gigio ti torro gràtzias, fintzas pro m’aere fatu regordare sa pipiesa mea.
Gràtzias a tie e a sa bellesa e sa maja de su mundu de sa pipiesa.
Manuela Ennas
