Desacrè, acrònimu de “Design sartoriale creativo ecosostenibile”, est unu progetu de artesanau eco-sustenìbili. Ddoi traballant maistas de pannu chi impreant materialis chi arrispetant s’ambienti, materialis chi a bortas ndi benint de s’ambienti etotu o benint torraus a impreai e funt duncas reciclaus.
Desacrè est un’azienda nàscia a s’acabbu de su 2018 de una pensada de Viviana Pes e Valentina Deriu, fèminas nugoresas de gabali chi ant inghitzau a cuncordai custa faina e a traballai impari giai in su 2014. Oi dda ghiant e ndi funt su coru, a pustis de ai studiau e ai postu is cumpetèntzias insoru aìnturu de unu progetu innovativu chi punnat a ponni in pratiga sa filosofia de su reciclu.
Sa coperativa sotziali chi produsit manufatus po impreus fitianus, trastos de design ecològicu, bistiris po atoris de teatru, piazamentus artìsticus, aparìciat puru cursus de formatzioni po pipius e mannus. Difatis is atividadis didàticas funt de importu e de fundamentu in is tareas insoru: is laboratòrius de draperia ddus stùdiant aposta po imparai a is discentis, po mori de s’arti de cosiri, is sentidus de su riciclu e de sa sustenibilidadi ambientali. Su laboratòriu de Nùgoro innui traballant est unu logu spantosu innui is maistas de pannu chi funt artistas ammostant is fainas insorus, comenti is bussas chi cuncordant totu cun materialis torraus a impreai, po nai su chi abarrat de cartellonis publitzitàrius in pvc chi agatant in is museus , is cinturas de seguresa de veturas bècias, sa gommapiuma, is arretàllius de tapesseria.
Materialis chi acostant e ammesturant cun imbentu a arroba tèssia de sa traditzioni sarda o tessìngius prus modernus o fatus de fibras naturalis. Una de is prus famadas intra de custas bussas dd’ant dedicada a su scultori sardu Francesco Ciusa e dd’ant fata cun su striscioni publitzitàriu chi promoviat sa mustra permanenti in su museu Tribu. Po favoressi s’economia circolari Desacrè sighit puru su refashion, est a nai una manera de mudai, de torrai a manixai e de arrangiai bistiris donendi-ddis una bisura noa. In mesu a is àteras fainas in sa butega artesana fait a apretziai sa lìnia de is “Prendas de sa terra”, manufatus ordimingiaus sceti cun materialis de orìgini naturali. Intra de custus ddoi funt is prendas de ‘Ortigu’, un’artista nugoresu chi traballat is tuponis de ortigu riciclaus boghendi-ndi lòrigas, collanas, bratzaletus e fintzas craixeddas Usb chi parint diaderus sculturas. Ddoi funt puru prendas fatas cun is fibras de sa figu morisca chi cuncordat una picioca de Casteddu agatendi una manera fini e geniosa de portai sèmpiri avatu unu biculeddu de Sardìnnia.
Sa coperativa difatis in prus de fai ammostu de is traballus de is artistas chi dd’ant fundada, cumbidada a àterus artistas po ammostai is òberas insoru e ponni in rèlata is maneras diferentis de imbentai sèmpiri cun arrispetu po s’ambienti e po sa terra nosta. Is òberas duncas chi agataus in su de Desacrè funt s’arresurtau de circas e de sperimentatzionis chi cosint a pari connotu e benidori donendi vida a trastus ùnicus e originalis chi sciint contai de issas, de custa ìsula, de un’ambienti chi tocat amparau, chena de perdi mai sa bellesa e sa finesa artìstica.
Su progetu est una realidadi chi est tenta in cosideru mannu ca at fatu de s’imbentu eco-sustenìbili sa ghia sua, giai giai comenti unu manifestu de is intentus chi tocat a tenni sèmpiri in menti in su traballu e in sa vida. Difatis dònnia produtzioni e dònnia sceberu Viviana Pes e Valentina Deriu ddas faint in manera sintzilla e artesanali, a cumentzai de sa circa de is materialis fintzas a lòmpi a s’arresurtau po sa bèndida, sighendi un’inditu èticu e sustenìbili chi aciungit a su valori artìsticu su valori fungudu de s’arrispetu.
Manuela Ennas
