Est acabbau domìnigu passau ,su 15 de ladàmini, su Campionau Mundiali de scacus “World Junior Rapid & BlitzChess Championship 2023” chi fiat cumentzau su 9, su lunis innantis. Su Campionau de scacus Rapid e Blitz Under 20, est a nai po piciocheddus e piciocheddas chi no tenint prus de binti annus, dd’ant giogau in su teatru comunale Maria Carta de Pula, postu a disponimentu de s’amministratzioni comunali. Ghiau de su GM (Grandu Maistu de scacus) Roberto Mogranzini, su torneu, intra de is prus de importu a livellu internatzionali po is giogadoris de custa edadi, dd’ant cuncordau Unichess, in collaboratzioni cun sa Emmedi Sport asd, cun sa Fide (International Chess Federation), cun sa Federatzioni Scachìstica Italiana, cun Vesus e cun s’agiudu de s’Assessorau po su Turismu de sa Regioni Sardìnnia. A su torneu ant liau parti atletas benius in rapresentàntzia de 26 federatzionis internatzionalis (Algeria, Armènia, Àustria, Azerbaijan, Bèlgiu, Croàtzia, Geòrgia, Germània, Ìndia, Israele, Itàlia, Kazachistàn, Kosovo, Marocu, Moldàvia, Mèssicu, Norvègia, Polònia, Romania, Rùssia, Scòtzia, Sèrbia, Repùblica de Santu Marinu, Svìtzera, Slovàchia, Ungheria).
Su primu de is duus tzircùitus, su Rapid, cun unu tempus de giogu intermèdiu (15 minutus prus 10 secundus po dònnia giogada) chi praxit meda po sa lestresa chi serbit, est sighiu po tres diis e po ùndixi turnus cun sa bìncida, cun otu puntus e mesu, in s’Open, est a nai su torneu abertu a mascus e fèminas, de Raunak Sadhwani, unu piciocu indianu intra de is prus fortis a su mundu, chi donànt comenti bincidori giai a sa vigìlia, e cun sa bìncida in su torneu femininu, cun sa bellesa de noi puntus, de Govhar Beydullayeva, una picioca chi benit de s’ Azerbaijan e chi in Sardìnnia etotu, s’annu passau, iat bintu, in Cala Gonone, su Campionau mundiali Under 20 a tempus longu. A pustus de una dì de pàsiu, innui is atletas ant giogau totus impari a fùbalu e funt andaus in giru a scoberri is bellesas e sa stòria de is logus a ingìriu de Pula, is luxis si funt torradas a allui in su teatru po su torneu Blitz, ancora prus lestru de su primu. Me is mesas de giogu, sèmpiri po ùndixi turnus, is giogadoris ant fatu partidas po unu tempus de tres minutus e duus secundus in prus po dònnia giogada, donendi spetàculu e biatzesa a una faina chi seus acostumaus a pensai lenta e sulena, innui s’arrexonamentu innantis de una giogada podit durai tempus meda lassendi-sì spantaus.
A binci custu tzircùitu po s’Open est stètiu Mahammad Muradli, unu piciocu de s’ Azerbaijan cun sa bellesa de noi puntus e mesu. Invècias po su torneu femininu, at bintu Xeniya Balabayeva, picioca de su Kazakistan cun otu puntus e mesu. Su Comitau Regionali de sa Sardìnnia, in unu comunigau de imprenta de su presidenti Danilo Mallò, sendi sèmpiri prus mannu s’interessu de is giòvanus sardus po custa disciplina isportiva, s’est ammostau orgolliosu meda po sa partetzipatzioni – a su tzircùitu Rapid – de unus cantu atletas isulanus a sa manifestatzioni. Po is piciocheddus sardus est stètia una manera nodida de connosci campionis de totu su mundu, de incarrerai amigàntzias noas e de giogai cun talentus de livellu artu, fintzas a pustis de is disafius ufitzialis. Su Comitau at bòfiu sinnialai s’arresurtau de cincu puntus lòmpiu de su primu classificau intra de is sardus, Matteo Meloni, unu giòvanu de su tzìrculu de Sàrdara, intrau de una pariga de mesis in su mundu de is scacus ma chi in pagu tempus est ammostendi talentu e arresurtaus interessantis. A pustis de issu Filippo Cugia, unu giòvanu de su tzìrculu CSC de Casteddu cun una bella proa in sa mesa de giogu, chi donat speras po su tempus benidori. Is premiatzionis ddas ant fatas domìnigu a merì in sa Pratza de su Pòpulu de Pula, po festai impari a sa comunidadi s’arrennèscida manna de custu acontèssiu chi de seguru est su primu de àterus meda chi tenint idei de apariciai, fintzas cun sa tarea de avalorai e afortiai su turismu ligongiau a su sport. In custas diis, àterus duus atletas sardus, Anna Garbarino, arribada segunda in sa categoria Under 8 a is Campionaus Natzionalis de Tarvìsio in su mesi de argiolas passau, e Giovanni Spiga, totu e duus de su tzìrculu Mosca de Casteddu, funt gioghendi a su Mundiali po is cadetus de Sharm el Sheikh, ca sa Sardìnnia, po comenti seus biendi, est sèmpiri prus terra de giòvanus amantiosus de custu sport.
Manuela Ennas
