Funt cumentzaus su 15 de mesi de ladàmini passau is primus bolus de sa cumpangia a bàsciu costu “Volotea” chi at a gestiri sa “continuidadi territoriali” in Sardìnnia fintzas a su 14 de maju de su2022.
Is billetus po bolus in partèntzia de sa Sardìnnia ( Casteddu, S’Alighera e Terranoa) po is aeroportus de Roma Fiumicino (a 39 èurus po is residentis) e Milano Linate ( a 47 èurus po is residentis) fait a ddus pigai in lìnia, in su giassu internet, opuru in is agèntzias de biaxi.
A s’inghitzu nci funt stètias unus cantu de polèmicas e crìticas po is faddinas de sa prataforma e is tarifas pagu craras po sceberai innui si setzi e cantu bagàlliu portai. Giai insaras, sa cumpangia iat nau de no tenni curpas : “Est giai unu miràculu si in 24 oras sceti seus giai in fainamentus in lìnia, sendi chi su cuntratu dd’eus firmau su 15 e in pagora seus donendi giai sa possibilidadi de pigai is bolus– iat nau Valeria Rebasti, sa ghiadora cummetziali de Volotea po s’Itàlia”. Ma immoi is fainas funt mellioradas meda.
De su primu de mesi de idas is bolus Volotea in continuidadi territoriali chi movint e lompint in terra sarda tenint difatis servìtzius nous fintzas po passigeris specialis: totu is chi pigant s’aparèchiu ant a podi biaxai impari a is animalis insoru.
Duncas, canis e pisitus de calisisiat mannària ant podi biaxai cun sa famìlia insoru. In prus de ai artziau su pesu màssimu permìtiu portendi-ddu a 10 chilus po canis e pisitus chi podint biaxai in cabina, Volotea at a permìtiri de imbarcai animalis prus mannus in sa steva.
In cabina is animalis ant a podi biaxai serraus in unu gàbbia o bursa de cussas po ddus tragai e ant a depi èssiri acumpangiaus de unu documentu de identidadi e de unu tzertificau sanitàriu.
Ma no est acabbada innoi. A pustis de custu servìtziu po canis e pisitus prevìdiu in regimi de continuidadi territoriali chi at asseliau totu is meris de animalis ca immoi no funt prus obrigaus a ddus depi lassai in domu candu partint, Volotea de su seti de mesi de idas, est oferrendi a is passigeris su servìtziu de trasportu pro minoris no acumpangiuas, chi fintzas a immoi no fiat possibili e iat pesau unus cantu de avalotu e polèmicas pruschetotu intra de is mammas e babbus chi bivint in logus diferentis.
“Totu is minoris intra de is 5 e is 13 annos – at dichiarau Volotea in una nota de imprenta – ant a podi biaxai chena de dificurtadi de e po sa Sardìnnia”.
Po permiti s’imbarcu, in prus de su documentu de identidadi o a su passaportu de su minori, at a tocai a ammostai una liberatoria firmada de su babbu e de sa mamma, chi fait a scarrigai de su giassu www.volotea.com, innui totu e duus narant chi eja a su trasportu de su minori. In su matessi documentu tocat a inditai puru is generalidadis de sa persona chi acumpàngiat su passigeri minori a sa partèntzia e de sa persona chi andat a ndi ddu pigai in aeroportu a s’arribu. Su servìtziu de trasportu de is minoris at a essi a disponimentu sceti in is bolus in regimi de continuidadi, e sceti a pustis de dd’ai prenotau in su giassu www.volotea.com o tzerriendi a su nùmeru birdi 800593877, dedicau a arrespundi a is abbisòngius de is passigeris in biaxi de e po sa Sardigna. Po dònnia bolu no at a fai a imbarcai prus de 2 minoris acumpangiaus.
“In totu su tempus de su biaxi – at nau Valeria Rebasti, is operadoris nostus ant a assegurai a is passigeris prus piticus unu bolu seguru e sulenu.Sa spera nosta est chi custu servìtziu donit sa possibilidadi de si movi in manera prus simpli a is pipius e a is famìlias insoru”.
Manuela Ennas
