Una circa de s’Istitutu de fisiologia clìnica de su Cnr, de s’Universidadi de Pàdua e de sa Flinders University (Austràlia) at ammostau comenti arrexonis sotzialis e econòmicas potzant ocasionai su fenòmenu de su gaming problemàticu. Gaming problemàticu bollit nai s’impreu smodiu de is videogiogus, unu fenòmenu sèmpiri prus spainau chi arrapresentat un’arriscu po sa saludi e is relatas sotzialis.
Giogai cun is videogiogus (gaming) no est una cosa sèmpiri negativa, ca podit essi una manera fintzas profetosa de passai su tempus lìberu. Sa crèscida de s’importu de custa faina in contu de tempus e de impìnniu in sa vida fitiana arriscat perou de ingendrai fenòmenus de dipendèntzia. Is giovuneddus, chi funt sa categoria chi passat prus tempus a giogai a is videogiogus, cun su gaming arremprasant sèmpiri de prus su tempus chi prima passànt a fai atividadi fìsica e a studiai. S’arresurtau est unu smenguamentu de is relatas sotzialis chi podit fai abarrai is giovuneddus a solus.
Su stùdiu de su Cnr, de s’Universidadi de Pàdua e de sa Flinders University, at pigau in consideru is cumportamentus de gaming de 89.000 piciocheddus intra de 15 e de16 annus chi bivint in 30 Stadus europeus. Po su 20% de is giovuneddus su perìgulu de gaming problemàticu est partu artu. Intra de issus, po is mascus su pèrigulu est tres bortas prus mannu chi po is fèminas. Sa percentuali prus arta de piciocheddus cun perìgulu de gaming problemàticu s’agatat in Romania (30,2%), sa prus bàscia in Danimarca (12%). S’Itàlia, cun su 24%, est asuba de sa mèdia europea.
Is cumportamentus perigulosus de gaming fait a ddus cumbati pruschetotu po mori de unu rolu ativu de is famìllias. Po amparai is piciocheddus difatis tocat chi is babbus e is mammas ddis dongant arrègulas craras e agiudu emotivu.
Un’importu mannu tenint puru is polìticas de amparu sotziali ca fintzas un’agiudu econòmicu piticu serbit po mellorai sa calidadi de is relatas intra de is fillus e is babbus e is mammas. Cun un’agiudu econòmicu fait a otenni fainas ricreativas alternativas chi favoressint unu svilupu prus sanu de is giovuneddus.
Su perìgulu de gaming problemàticu difatis est prus artu me is Stadus innui is diferèntzias econòmicas funt prus mannas e est prus bàsciu me is Stadus chi imbestint de prus in polìticas de saludi pùblica, comenti agiudus fiscalis po is famìlias.
Massimiliano Meloni
