Sa Cummissione europea in su mesi de cabudanni passau at fatu una proposta de lei po proibiri sa bendida de benis prodùsius po mori de s’isfrutamentu de su traballu de is pipius. Sa proposta arribat a pustis de una dibata portada a innantis me is ùrtimus annus po agatai is maneras prus profetosas po cumbati custu fenòmenu.
Su traballu de is minoris est proibiu in totu s’Unioni Europea de meda tempus e dònnia Stadu tenit is leis pròpias. In Itàlia sa lei chi no ddu permitit est sa nùmeru 977 de su 1967, chi at postu in pràtiga una diretiva de sa Comunidadi Econòmica Europea (ca insaras s’UE no esistiat ancora). Custa lei dennegat su traballu de is minoris chi no tenint asumancu 15 annus e no ant acabbau sa scola de s’òbbrigu. Sa lei permitit calincuna ecetzioni: is pipius podint traballai me is setoris culturali, artìsticu, sportivu e de su spetàculu ma ddis tocat a tenni su permissu de is babbus e de is mammas insoru e de is Ispetoris de su traballu. In prus a is pipius chi traballant tocat a ddis assegurai unus cantu de diritus pretzisus, po esèmpiu in contu de seguresa fìsica e psicològica e de dignidadi personali e no fait a ddis fai perdi sa scola po traballai.
Mancai Is leis, comenti cussa italiana, esistant in totu Europa, aìnturu de s’Unioni Europea a is pipius ddus sighint a isfrutai. Chi boleus pigai in consìderu sa situatzioni de su Stadu italianu, tocat a impreai una circa de Save The Children, fata impari a s’Istat in su 2013, ca no esistint datus de prus pagu tempus fait. Segundu custu stùdiu is pipius isfrutaus funt 340.000 e traballant pruschetotu comenti castiadoris de àterus pipius, camareris, manorbas, giorronaderis de sartu.
A foras de s’Unioni Europea, me is stadus prus pòberus, sa situatzioni est grai meda, ca in cussus logus no esistint nimancu leis contra a s’isfrutamentu de is minoris. Segundu Save The Children is pipius isfrutaus in su mundu funt 152 millionis. De custus,112 millionis traballant in su setori de sa laurera e 73 millionis faint traballus perigulosus meda po sa saludi e sa seguresa fìsica e morali insoru. Torrendi duncas a sa proposta de lei de sa Cummissioni europea, s’isfratamentu de is pipius est contra a is valoris de s’Unioni europea e tocat a ddu cumbati aìnturu e a foras de s’Europa. Sigumenti is benis prodùsius cun s’isfrutamentu de is pipius ddus important e ddus bendint in Europa, s’arrocu de sa bendida insoru est parta sa manera chi podit ferri de prus custas pràtigas. A sa proposta de sa Cummissioni, po dda fai lei, immoi ant a depi nai eja su Parlamentu europeu e su Consillu. Sa spera est chi sa cosa siat lestra ma is spertus pensant chi ddoi ant a bolli asumancu duus annus.
Massimiliano Meloni
