Su Ministru de s’Istrutzioni Bianchi at detzìdiu chi in is esàminis de diploma ant a torrai is proas scritas, chi po nexi de sa apedèmia ammancant de duus annus. S’ordinàntzia su Ministru dd’at giai firmada e immoi abetat sceti su parri de su Consillu superiori de s’Istrutzioni po dda portai a innantis.
Is esàminis ant a cumentzai su 22 de làmpadas cun sa prima proa scrita, chi at a èssi de italianu e aguali in totu Itàlia.Is studentis ant a podi sceberai intra de seti ìndicus, chi ant a pertocai tres lìneas de argumentus diferentis: anàlisi e interpretatzioni de unu cumponimentu literàriu, anàlisi e produtzioni de unu cumponimentu, arrexonu crìticu apitzus de acadessimentus de atualidadi.
Su 23 de làmpadas ddoi at ai sa segunda proa scrita. Custa proa at a essi diferenti po dònnia indiritzu de stùdiu e at a pertocai una matèria sceti intra de cussas chi marcant s’indiritzu. Dd’at a apariciai dònnia cumissioni de esamini, de manera chi siat acapiada a is programmas chi is studentis ant sighiu me is annus de scola.
Sa de tres proas, s’ùrtima, at a essi un’arrexonu a boxi apitzus de una faina sceberada de sa cumissioni, chi at a podi essi unu cumponimentu, unu problema, unu progetu. S’arrexonu at a pertocai fintzas s’Educatzioni cìvica e, po mori de un’arrelatu o de unu progetu multimediali, is esperèntzias de su tirocìniu Pcto, est a nai laboratòrius de traballu cumpartzius cun sa scola.
Ant a fai parti de sa cumissioni de esàmini ses cumissarius intra de is docentis de sa scola e unu Presidenti chi benit de foras.
Is proas scritas, in prus de sa Maturidadi, torrant fintzas po s’esàmini de sa de tres classis de sa scola segundària de primu gradu. Innoi a una primu proa de italianu at a sighiri una segunda proa apitzus de is cumpetèntzias lògicu-matemàticas. A s’acabbu is piciocheddus ant a depi tenni un’arrexonu a boxi chi at a pertocai fintzas sa lìngua inglesa, una segunda lìngua europea e s’Educatzioni civica.
Massimiliano Meloni
