Passau su primu de maju, passada sa festa. Ma cali festa? Una festa chi, si boleus crei a unu de is ùrtimus sondàgius de Euromèdia, sceti po su 28% de is italianus sighit a tenni unu sentidu de importu. Su primu de maju, chi iat a depi festai su traballu e is traballadoris, po su 30,2% de is italianus est sceti una dì chi serbit a is polìticus po si ponni in mosta e po fai propaganda. Po su 19,8% est una festa cumandada de sa polìtica e po su 16,5% oi est una festa stantissada. Sceti su 28,4% pensat chi tèngiat ancora unu valori de importu. Po sa majoria de sa genti su primu de maju, impari a su 25 de àbrili, est sceti un’ocasioni po fai ponti. Ma est sa festa sceti chi at pèrdiu sentidu, cosa grai giai de sei, o est puru su valori de su traballu comenti diritu a no cumbinci prus sa genti?
Su traballu est unu de is fundamentus de sa Costitutzioni, chi ocannu fait 75 annus. Is primus fueddus de sa Costituzioni, stabilessint chi s’Itàlia est una Repùblica fraigada apitzus de su traballu (art. 1, c. 1) e me in s’art. 4 su diritu de su traballu sa Repùblica dd’arreconnòsciit a totus e punnat a promovi is conditzionis chi ddu pòngiant diaderus in fainamentu.
Ma mancai su valori mannu chi sa lei primàrgia donat a su traballu, prus de tres italianus asuba de cuàturu pensant chi is fueddus de sa Costitutzioni no apant agatau nisciuna realizatzioni in sa sociedadi nosta. Forsis poita ca unu traballu bìviu comenti “sutapagau” de su 37,3% de sa genti est difìtzili chi potzat donai dignidadi a sa persona. Est pròpriu s’allega de su traballu sutapagau chi oi arrapresentat unu barrancu mannu po meda genti. Chi me is tempus passaus su tenni unu traballu donàt seguresa e cunfiàntzia in su benidori, oi no est prus deaici. In medas situatzionis su traballu no bastat, ca mancai ddoi siat, a solu, no permitit de bivi, e seus fueddendi de unu fenòmenu sèmpiri prus presenti in sa sociedadi italiana. Calis funt is traballadoris prus sutapagaus? Mancu a ddu nai, is fèminas e is giòvunus. Ma su problema no est sceti de categorias, est prus spaniau e pertocat totus.
Po is economistas tocat a scerai intra de traballadoris pagaus pagu e traballadoris pòberus. Is primus funt traballadoris chi ddus pagant prus pagu de una certa cifra (calculada apitzus de totu is rèdditus), mentris is segundus funt traballadoris chi bivint in una famìllia chi tenit unu rèdditu prus bàsciu de una certa cifra. Est beru: is traballadoris pagaus prus pagu funt pruschetotu is fèminas e is giòvunus. Ma is traballadoris poberus funt pruschetotu òminis, ca sa paga insoru est medas bortas s’ùnica paga de sa famìllia. Sa diferèntzia serbit sceti a ponni totus aìnturu de su matessi problema, unu problema chi est ammanniendi-sì sèmpiri prus e chi po is economistas tenit arrexonis medas. Sa prima est sa globalizatzioni, chi at mòviu sa produtzioni in Stadus cun unu costu de su traballu prus bàsciu e at fertu is conditzionis de is traballadoris me is Stadus ocidentalis puru. A sighiri sa tecnologia: is trastus tecnològicus arrennèsciint a fai sèmpiri prus cosas e deaici funt arrampresendi is traballadoris. In custas conditzionis su traballu no est prus seguru e fait a ddu perdi cun facilidadi. Sa crèscia de is disagualidadis no favoressit is categorias prus dèbilis: me is ùrtimas dexinas de annus sa richesa s’est cuncentrada me is manus de sèmpiri prus pagu genti e funt is fèminas e is giòvunus is chi sunfrit de prus po custa cosa.
Invècias de tenni gana de festai unu traballu chi no tenint o chi est sutapagau in medas duncas preferrint a no dd’arreconnosci nimancu comenti valori e diritu ca pensant chi siat una fàula. Iat a tocai forsis a lassai a una parti polèmicas e propaganda e torrai a pensai a su chi punnànt is chi 75 annus fait ant scritu sa Costitutzioni.
Massimiliano Meloni
