Su turismu ecosustenìbili, in lìnia cun is tareas de unu svilupu econòmicu e de una manera de bivi profetosus po s’ambienti e po is generatzionis benidoras, est divènniu un’allega sèmpiri prus de importu me is ùrtimus annus. Po custa arrexoni est ammanniendi-sì su nùmeru de personas chi circant sperièntzias de biaxi utilosas po su praneta e sa sociedadi.
Po s’UNWTO, s’Organizatzioni Mundiali de su Turismu, su turismu sustènibili est “su turismu chi tenit cuscièntzia de is efetus socialis, econòmicus e ambientalis de su tempus de oi e de su benidori, chi satisfat is abisòngius de is biaxadoris, de is comunidadis localis, de s’ambienti e de is impresas”. Custa definitzioni pigat in consìderu su profetu de su turismu, in unu tempus longu, po totu is chi liant parti a su processu.
Is ideas de fundamentu de su turismu sustenìbili funt tres: ambienti, ètica e economia. Po su chi pertocat s’ambienti, s’impìnniu est de no dd’imbrutai a livellu siat globali siat locali, de circai de amparai is diferèntzias biològicas e de promovi pràtigas utilosas po s’ambienti. Faint parti de custu sentidu is atividadis turìsticas chi tenint bogaduras bàscias de anidridi carbònica, comenti s’impreu de mèdius de trasportu chi no imbrutant e de energias chi fait a annoai, s’amparu de is resursas naturalis e s’impreu responsàbili de s’energia e de s’àcua. In contu de ètica su turismu sustenìbili tenit sa tarea de favoressi un’integratzioni sociali prus manna intra de is biaxadoris e de is comuinidadis localis, arrispetendi su patrimòniu stòricu, artìsticu e culturali de is logus visitaus. Invècias de promovi un’oferta turistica aundisisiat aguali, custu turismu alentat cumportamentus èticus, chi arrispetint is leis e su connotu de dònnia Paisu e comunidadi. In contu de economia, cun totu chi is movimentus turìsticus espressant un’oportunidadi manna po meda Paisus, su turismu sustènibili tenit sa tarea de no intzimai dannus a is comunidadis localis, pruschetotu cussas prus dèbilis, po promovi unu svilupu chi favoressat s’inclusioni sociali e sa richesa de totus. In prus circat de produsi traballu, de fai comporai is produtus e is servìtzius localis po sustenni s’economia locali e smenguai is efetus negativus de s’economia globali.
Is generatzionis noas, pruschetotu sa GenZ, funt atentas meda a s’importu de sa sustenibilidadi e bolint biaxai in manera responsàbili. Custa generatzioni punnat a tenni sperièntzias de biaxi sintzillas e a intrai in relata cun s’ambienti e is culturas localis. Sa GenZ est sa prus pronta a fai scioberus de biaxi chi siant in lìnia cun is ideas de su turismu sustenìbili. Custa cosa fait a dda biri puru in sa punna de biaxai in logus pagu connotus e de provai maneras de vida prus sulenas. Mancai custa cuscièntzia noa, tocat a fai ancora meda po arremprasai su modellu de turismu de is tempus passaus cun unu turismu ecosustenìbili. Una circa fata de su Boston Consulting Group, unu Stùdiu famau de cunsilleris de impresas, imprentada pagu diis fait cun su tìtulu “Steering Consumers to Greener Travel and Tourism Choices” ammostat una diferèntzia manna intra de su chi si pensat in contu de turismu ecosustenìbili e sa realidadi de is datus arregoltus. Su setori de is biaxis e de su turismu produsit su 10% de is bogaduras globalis, chi s’ant a ammanniai de su 5% a s’annu. De su stùdiu bessit a pillu chi su 40% de is bogaduras de su setori ddas produsint is consumadoris cun is scioberus insoru. Mancai su 80% de custus consumadoris narint de essi impensamentaus po s’ambienti, sceti su 10% biaxant ponendi atentu po primu cosa a sa sustenibilidadi a deretura su 65% narant de fai scioberus chi no dda pertocant poita no pensant de nci depi punnai. S’impreu de is tecnologias noas – pensaus sceti a sa tecnologia NFC – e de is retzas socialis podint fai meda po spaniai su turismu ecosustenìbili, ma a ddu promovi est una responsabilidadi de totus, ca tocat a ddu fai po amparai su benidori de is chi at a benni a pustis de nosu.
Massimiliano Meloni
