Su 12 de làmpadas eus a votai cincu referendum asuba de sa giustìtzia, promòvius de sa Lega e de is Radicalis. Funt referendum chi pedint de annuddai leis, o una parti de leis sceti. No ant a balli chi no at a pigai parti a is votatzionis sa majoria de is chi tenint su diritu de votu. Po annuddai is leis tocat chi sa majoria de is chi votant votit “eja”.
Sa primu chistioni pertocat su sistema po eligi is giugis chi faint parti de su Consillu Superiori de sa Magistradura (CSM). Su Csm est s’òrganu de autoguvernu de sa magistradura. Ndi faint parti de diritu su Presidenti de sa Repùblica, chi est puru Presidenti de su Csm, su Primu Presidenti e su Procuradori Generali de sa Corti de Cassatzioni. Is àterus 24 cumponentis ddus eligint po 2/3 is magistraus, sceberendi-ddus intra de is magistraus etotu, mentris su 1/3 chi abarrat ddu eligit su Parlamentu in sètzida comuna. Oi a unu magistrau chi bollit proponni sa candidadura sua ddi tocat a arregolli a su mancu 25 firmas de àterus magistraus.
Su referendum punnat a annuddai custa norma, permitendi a dònnia magistrau de si presentai chena de s’agiudu de àterus magistraus e chena, pruschetotu, de s’agiudu de is “currentis” polìticas chi ddoi funt aìnturu de sa magistradura (calincuna prus “de centru”, àteras prus acanta a sa manca opuru a sa dereta). Is chi funt po s’eja iant a bolli annuddai sa norma pròpriu po smenguai su pesu de is currentis aìnturu de su Csm, chi decidit is incàrrigus e is trasferirimentus de is giugis. Is chi funt po su no pensant chi su referendum siat asuba de una cosa de pagu importu, chi no iat a portai giambamentus de profetu in contu de su pesu de is currentis in sa magistradura.
Sa segunda chistioni punnat a annuddai is arrègulas chi no permitint a is cumponentis de is Consillus Giuditziàrius, chi no funt giugis, de pigai parti a sa valutatzioni de is magistraus. Is magistraus difatis ddus valutat su Csm dònnia cuàturu annus pighendi in consìderu fintzas is parris cuncordaus de is Cunsillus Giuditziàrius, chi funt òrganus territorialis cumpostus po 2/3 de magistraus e po 1/3 de abogaus e professoris universitàrius in matèrias giurìdicas. Is cumponentis de custus Cunsillus, chi no funt magistraus, immoi no podint pigai parti a is arrexonus e a is votatzionis asuba de is cumpetèntzias de is magistraus.
Is chi funt po s’eja iant a bolli annuddai custa norma po fai prus ogetivus is giudìtzius asuba de is òperas de is magistraus. Chi est contràriu pensat chi s’annuddamentu de sa norma potzat ponni in discussioni su princìpiu de sa “terztiedadi”’ de su giugi, ca in unu processu s’iat podi agatai ananti s’abogau chi pigat parti a sa valutatzioni sua.
Massimiliano Meloni
