Torraus a fueddai de is referendum de annuddamentu asuba de sa giustìtzia, promòvius de sa Lega e de is Radicalis, chi eus a votai domìnigu 12 de làmpadas chi benit, de is 7 de mangianu a is 11 de noti. A pustis de ai pigau in consìderu is primas duus chistionis circaus de biri is àteras tres.
Sa de tres chistioni punnat a annuddai unus cantu de normas chi permitint a is magistraus de passai de su rolu de Pùblicu Ministeru a cussu de giugi, o a s’imbressi.
Su Pùblicu Ministeru est su magistrau chi in unu processu rapresentat s’acusa e duncas est “contra” a s’incurpau. Su giugi invècias est su magistrau chi depit giudicai s’incurpau e duncas depit essi “super partes” est a nai chi no depit fai is partis ni a s’acusa ni a sa defensa.
Cun is normas de oi fait a passai de giugi a Pùblicu Ministeru, o a s’imbressi, cun calincunu lìmidi e po no prus de cuàturu bortas.
Chi at a binci s’eja dònnia magistrau at a depi scioberai a su cumentzu de sa carriera sua chi bolit fai su giugi o su Pùblicu Ministeru.
Is chi funt po s’eja narant chi oi ddoi funt Pùblicus Ministerus chi traballant meda tempus, fintzas annus, po fraigai acusas e, totindunu, bessint giugis.In custa manera po issus no est fàcili essi “super partes”. Cun sa sceradura de is carrieras invècias is giugis ant a essi diaderus “de tres”e “impartzialis”. Is chi funt contra narant po primu cosa chi un’arreforma de importu aici mannu iat a depi essi fata po mori de una lei de su Parlamentu, no cun unu referendum. In prus, po issus, su scerai PM e giugis iat a stesiai is PM de una “cultura de sa giurisditzioni” mudendi-ddus de magistraus in averiguadoris.
Sa de cuàturu chistioni punnat a smenguai is arrexonis chi permitint a is giugis de disponni sa tenta po cautella. Sa tenta po cautella est una smenguadura de sa libertadi de unu spriculitau innantis de su processu, chi sa norma prebidit sceti po tres acuntèssius: chi ddoi est su perìgulu chi s’incurpau si nci fuat, chi potzat cunfundi is proas o chi potzat torrai a fai su reatu chi dd’incurpant.
Chi bincit s’eja at a essi annuddada, po is reatus prus grais, sa tenta po cautella decìdia po su perìgulu de torrai a fai su reatu.
Po is promovidoris de su referendum, in Itàlia sa tenta po cautella dd’impreant mali, poita funt medas is spriculitaus impresonaus chi bessint notzentis me is processus. Chi est contràriu pensat chi su referendum iat a annuddai una norma chi serbit a amparai sa seguresa pùblica e is vìtimas de medas reatus comenti, po esèmpiu, su stalking e sa bèndida de droga.
Sa de cincu chistioni tenit sa tarea de annuddai sa lei Severino, chi pigat su nòmini de sa Ministra de sa Giustìtzia de su Guvernu Monti. Po custa lei, chi unu polìticu ddu cundennant in bia definitiva, issu no si podit torrai a candidai e nimancu fait a ddu eligi. Chi est giai elìgiu, issu decàirit de sa càrriga. In contu de aministradoris de entis localis sa lei ballit puru po is cundennas in primu gradu, e duncas chi no funt definitivas.
Chi at a binci s’eja totu sa lei at a essi annuddada e eus a torrai a sa situatzioni chi ddoi fiat innantis de su 2012. Is giugis ant a torrai a decidi, a s’acabbu de dònnia processu, chi su cundennau at a podi tenni incàrrigus polìticus o nono, chena chi sa cosa siat automàtica.
Po chi est a favori de s’eja custa lei ferrit pruschetotu is aministradoris localis poita a issus ddis tocat a lassai s’incàrrigu puru po una cundenna in primu gradu, mancai pustis ddus asciollant casi sèmpiri. Chi est contràriu marcat chi su referendum iat a annuddai totu sa lei e no sceti is normas chi pertocant is aministradoris localis e pensat chi deaici iat a essi annuddada una lei de importu po cumbati sa corrutzioni.
Massimiliano Meloni
