Innantis de s’apedèmia, in Itàlia, su traballu de atesu e su traballu lestru pertocànt 2.458.210 traballadoris, est a nai su 11% de su totali. In su 2020, in sa fasi prus grai de s’apedèmia, custu nùmeru est artziau fintzas a casi 9 millionis. In su 2021 is chi ant traballau in manera lestra funt stètius 7.262.99, su 32,5% de su totali de is traballadoris. Chi sceraus intra de setori privau e setori pùblicu, bieus chi su traballu lestru at interessau su 39,7% de is traballadoris pùblicus e su 30,8% de cussus privaus.
Custus datus bessint a pillu de unu stùdiu de pagus diis fait imprentau de s’Istitutu Natzionali po s’Anàlisi de is Polìticas Pùblicas (Inapp), un’enti pùblicu de circa chi stùdiat is profetus de is polìticas pùblicas in contu de su mundu de su traballu.
Chi andaus a biri sa spartzidura de is diis traballadas, su stùdiu ponit in craru chi casi su 50% de is traballadoris at traballau in custa manera de 3 a 5 diis a sa cida e sceti su 11,6% una dì sceti.
Su setori privau at pigau prus de su setori pùblicu in consìderu sa possibilidadi chi custa manera de traballai potzat essi impreada puru candu at a acabbai s’apretu sanitàriu e difatis at spèndiu de prus po sa formatzioni de is traballadoris.
Su traballu lestru, mancai realisau in sistemas organizativus chi no fiant prontus e po mori de tennologias chi meda bortas no andànt beni, po prus de sa metadi de is interessaus (55%) est stètiu un’esperièntzia profetosa pruschetotu in contu de sa libertadi de organizai e gestiri is relatas familiaris.
Po su chi pertocat is cosas negativas invecis, po casi su 60% de is interessaus, su traballu lestru ingendrat soledadi, no agiudat me is relatas intra de cumpàngius de traballu e po calincunu fait cresci puru is bulletas de sa luxi. Una percentuali manna de is traballadoris lestrus, est a nai su 40% in su setori privau e su 50% in cussu pùblicu, si chèsciat puru chi ddi tocat a essi sèmpiri acapiada a is retzas socialis chi impreat po traballai.
Su stùdiu ammostat perou, nointamas custas cosas negativas, chi ddoi funt is conditzionis po passai de unu traballu lestru fatu po nexi de s’apretu sanitàriu a maneras noas de traballu acapiadas a processus produtivus nous.
Custa cosa fait pensai poita chi su traballu lestru iat a essi una manera de traballai comenti is àteras iat a tocai a torrai a pensai a su benidori de is citadis e de su territòriu. Prus de 1/3 de is traballadoris, difatis, iat a andai a bivi in una bidda pitica e cuàturu personas asuba de dexi iant a bivi assoladas in mesu a sa naturalesa.
Massimiliano Meloni