Su Guvernu nou at fatu sciri chi at a artziai su lìmidi po s’impreu de su dinai in càmbiu. Sa majoria chi at bintu is eletzionis teniat custa tarea in su programma eletorali e duncas est una cosa chi at a fai a lestru. Immoi su lìmidi est de 2.000 èurus e sa lei n.15/2022 dd’abàsciat indiritura a 1.000 èurus a cumentzai de su primu de gennàrgiu de su 2023. Is cosas perou ant a mudai a su contràriu prima de insaras e sa Lega at giai cuncordau sa proposta sua po artziai su lìmidi a 10.000 èurus.
S’idea de sa majoria at divìdiu sa polìtica e est cumentzada sa dibata. Sa punna de is chi funt a favori de unu lìmidi bàsciu – is chi funt contra a su Guvernu – est cussa de cumbati su sfrosu e is pagamentus illegalis mentris sa punna di is chi funt contra a unu lìmidi bàsciu – sa majoria de centru dereta – est cussa de favoressi is butegajus e chi no podit spendi po tenni unu contu in banca.
Siat is chi funt contra siat cussus chi funt a favori de s’idea de su Guvernu pigant in consideru stùdius e circas de importu. S’annu passau unu stùdiu de sa Banca d’Itàlia at stimau chi sa crèscia de su 1% de is pagamentus fatus cun dinai in càmbiu at portau a una crèscia intra de su 0,8% e su 1,8% de s’economia cuada. Àterus stùdius, comenti unu de sa Bundesbank de su 2017 e unu de s’Europol de duus annus fait, ponint indiritura in relata s’impreu de su dinai in càmbiu cun su gadàngiu chi arribat de atividadis criminalis comenti sa droga, s’usura e su cummèrciu de is armas ca totus custas cosas ddas pagant cun dinai in càmbiu.
Àterus stùdius ancora narant chi intra de is lìmidis a s’impreu de dinai in càmbiu e sfrosu – e pagamentus illegalis – no ddoi at una relata crara. S’European Consumer Centres Network, un’organismu strantaxau de sa Cummissioni Europea in su 2005 po amparai is consumadoris, at arregortu is datus de is 27 Stadus de s’Europa ammostendi chi me is 10 Stadus chi no tenint lìmidi a s’impreu de su dinai in càmbiu, no ddoi at sèmpiri unu sfrosu artu. Su livellu de sfrosu e de economia cuada difatis dipendit de arrexonis diferentis – culturalis, econòmicas, criminalis – e no fait a dda acapiai a un’arrexoni sceti. Pagella Politica, unu giassu de averiguadura de is novas, at pigau in consìderu is arrecumandìtzias de sa Banca Centrali Europea, chi no funt sèmpiri is matessis. Chi in su 2019 sa Bce iat arrecumandau a s’Itàlia de ammanniai is pagamentus eletrònicus abascendi puru is lìmidis po is pagamentus cun dinai in càmbiu, s’annu pustis iat nau chi is lìmidis de sa Grècia (500 èurus) e de s’Ispànnia (1000 èurus) fiant tropu bàscius. Po sa BCE custus lìmidis poniant in dificultadi is partis prus dèbilis de sa populatzioni.
Massimiliano Meloni
