Chie fiat giovaneddu 30 annos a como, o chie lu est oe ma tenet curiosidade bastante manna in campu musicale italianu, est capatze chi connoscat “Figli di Annibale” de sos Almamegretta. «Annìbale bincheit is romanos, firmu in Itàlia che padronu pro bìndighi o bint’annos, mi’ su proite in medas tenimus pilos iscuros, mi’ su proite in medas tenimus ogros iscuros, mi’ su proite in medas tenimus carena iscura. Agigu ‘e sàmbene suo, a totu cantos nos abarrat in sas venas».
Pagu prus o mancu, traduida, gasi torrat; produende unu contu chi tenet sos sèmenes de una timòria chi est a rodeu in sa rive droite de su globu terràcueu otzidentale: sa timòria de sa sostitutzione ètnica. Unu sentidu chi non naschet como e chi in Itàlia est parte de s’agenda polìtica bruna (e ruju-bruna) in antis meda de sos faeddos de su ministru de sa massaria Francesco Lollobrigida. Est bastante a pensare a su complotismu de sos chi dae tempus mentovant unu Pianu Kalergi pro acumprire a unu genotzìdiu de sas populatziones biancas pro more de àteras “ratzas”, pro more de unu coordinamentu internatzionale chi finàntziat sas migratziones.
S’Europa? Soros? Si faghimus una chirca de sas crònacas de Pontida in tempos de una camba de Parlamentu presèdida dae Laura Boldrini e de unu ministeru ocupadu dae Cécile Kyenge (su matessi tempus chi nascheit Fratelli d’Italia) su repertòriu essit totu cantu a campu che cocorra a pustis pròidu.
In prus de s’impreu polìticu suo (annangamus·bi Donald Trump in Usa, Viktor Orbán in Ungheria, Éric Zemmour in Frantza e s’ùrtimu lu lassamus a concruos), su cuntzetu de sostitutzione ètnica l’agatamus in sas motivatziones o in sas rivendicatziones de unas cantas istrages acumpridas dae unos cantos suprematistas biancos (forsis movent dae inoghe sas cundennas de Elly Schlein).
Su 2011 s’estremista Anders Breivik morgeit 77 persones in Oslo e in s’ìsula de Utøya; pro firmare «sos invasores ochiende a su pòpulu nostru» e sos assòtzios chi faghent intrare istràngios Robert Bowers assachieit una sinagoga in Pittsburgh ferende·nde a morte 11 su 2018; gasi etotu s’annu a pustis cun s’atentadu de Brenton Tarrant in sas moscheas de Christchurch, Zelanda Noa, 49 mortos; o galu su de Buffalo, in Amèrica s’annu coladu cun sos 10 mortos pro manu de tale Payton Gendron, che a Tarrant orioladu de sa denatalidade e de su «genotzìdiu» de sos biancos.
«No l’ischia chi custa espressione est impreada dae terroristas, istragistas, estremistas. Apo lèghidu meda ma non perdo tempus cun machines complotistas», at naradu oe su ministru Lollobrigida intervistadu dae su Corriere della Sera. E in agiudu suo est lòmpida finamentas sa ministra pro sa Famìlia Eugenia Roccella chi ghetat sas neghes a s’ideologia globalista chi «apaltat a sos paisos pòberos sa tarea de fàghere fìgios». Che chi in cussos paisos lu fatzant a cumandu e che chi inoghe non b’apat una resone materialista de custa mèngua demogràfica.
Semper e cando, torremus a sos logos de Annìbale, a sa terra chi unu tempus fiat Cartàgine. Ca fintzas in Tunisia, pro nàrrere, tenent unu presidente (Kaid Saied) chi at denuntziadu s’esistèntzia de unu «pianu criminale» bene ordimingiadu e sestadu pro nche giùghere a cue una grandu tràmuda de migrantes subsaharianos e, duncas, acumprire a custa sostitutzione. Pro Saied cherent fàghere de cussu paisu de s’Àfrica bianca unu paisu de s’Àfrica niedda.
Ma sigomente fintzas dae Tunisia movent sos migrantes (nemos est faeddende prus de sas partèntzias organizadas o cajonadas dae su grupu Wagner in Lìbia), acò chi sa resistèntzia ètnica de sas duas deretas non podet cumbinare. Che a sos sovranismos.
Mauro Piredda
