In Itàlia, segundu unu stùdiu de Piaac-Ocse de su 2019, casi su 28% de sa populatzioni intra de 16 e 65 annus est “inarfabeta funtzionali”. Est su datu prus artu intra de is Stadus europeus, cumpartzidu cun sa Spànnia.
S’inarfabeta funtzionali est una persona comuna chi, mancai scìpiat ligi, scriri e contai, no arrennescit a cumprendi beni is informatzionis prus de importu chi ddoi funt in su chi ligit e a ddas torrai a spricai. Issu, segundu su stùdiu, no arrennescit “a cumprendi, valutai, impreai documentus scritus po intrai in chistioni in manera ativa in sa sociedadi, po lompi a is tareas suas e po ammanniai sa connoscèntzia e is capacidadis suas”.
S’inarfabeta funtzionali, chi ligit un’artìculu o unu post, no averìguat is mitzas de s’informatzioni e punnat a crei a totu, sena de tenni dudas apitzus de su chi ligit. Punnat a mudai is allegas difìcilis in cosas de pagu importu e a no crei a is boxis de importu (scientziaus, professoris, spertus). No est bonu a ascurtai e no ammitit s’incumpetèntzia sua.
Segundu is datus de su stùdiu, su 5,5% de is inarfabetas funtzionalis cumprendit sceti is informatzionis elementaris, chi s’agatant in documentus curtzus meda e cun unu fueddàriu pòberu. Su 22,2% lompit a sa cumprensioni de documentus ammesturaus (siat de paperi chi digitalis) chi perou depint essi curtzus bastanti.
Un’àtera circa Piaac at ammostau chi s’inarfabetismu funtzionali est spainau meda me is chi tenint prus de 55 annus, perou me is ùrtimus tempus est ammanniendi-sì in sa fàscia de edadi intra de is 14 e is 29 annus, pruschetotu intra de chi no stùdiat e no traballat.
Tocat a no cunfundi s’inarfabetismu funtzionali cun s’inarfabetismu struturali, est a nai su no sciri lìgiri ni scriri. Segundu is datus Istat sceti su 0,8% de sa populatzioni italiana s’agatat in custa situatzioni. S’inarfabetismu funtzionali est sèmpiri esìstiu ma su web e is retzas socialis ant fatu cresci su fenòmenu. Is spertus marcant chi custu fenòmenu est una cosa negativa meda po sa sociedadi, poita prus unu Stadu nd’est fertu, prus pagu est capassu de cumbati sa cuncurrèntzia de is àterus Stadus. Is solutzionis, de seguru, podint essi ancora una borta sa formatzioni e s’istrutzioni, donendi s’importu chi ddis minescint a sa famìlia e a sa scola.
Massimiliano Meloni
