Cida passada su Parlamentu Europeu at nau eja a sa proposta de ponni fini, a partiri de su 2035, a sa registratzioni de veturas noas chi no siant elètricas. Duncas, parit chi in s’Ue de su 2035 no s’ant a podi prus bendi veturas a benzina o a gasòliu e s’arrocu pertocat puru is veturas ìbridas.
Sa tarea est de annuddai is bogaduras de anidridi carbònica de is veturas po cumbati s’alluamentu e is giambamentus climàticus.
Prima de intrai in sa chistioni e me is polèmicas chi si portat a fatu, tocat a nai chi sa votatzioni de su Parlamentu Europeu no est ancora lei, ca is regolamentus de s’Ue po intrai in fortza tocant aprovaus de su Parlamentu, eja, ma puru de su Consillu Europeu e custa passada dda depint ancora fai. Arregordaus chi su Consillu Europeu espressat is Stadus de s’Unioni e est formau, in dònnia atòbiu, de is ministrus chi me is Stadus insoru tenint sa dèlega po s’allega chi pertocat sa votatzioni. In Europa funt medas is boxis contràrias a custa lei e funt boxis de dònnia colori polìticu.
Sa nova no dd’agradessint po primu is aziendas chi produsint veturas e pruschetotu is chi produsint partis de veturas, cosa chi est sentida meda in Itàlia. Segundu Confindùstria is traballadoris de su setori de is veturas chi arriscant de perdi su traballu funt casi 70.000. Difatis est difìtzili chi is aziendas potzant mudai is processus produtivus po passai de su motori a abbruxamentu a cussu elètricu intra de su 2035, una data chi est prus acanta de cantu parit. Genti meda biit in custa decisioni unu scioberu ideològicu, chi no pigat in consìderu sa realidadi econòmica e chi at a favoressi àterus Stadus comenti sa Cina, chi oindì est su produtori prus mannu de baterias e àteras partis po is veturas elètricas.
Puru Romano Prodi, giai Presidenti de sa Cummissioni Europea, at espressau dudas in contu de is cunseguèntzias econòmicas negativas, po s’Europa, de una decisioni chi iat a favoressi àteras economias, pruschetotu cussa cinesa. Po su chi pertocat sa batalla contras s’alluamentu e is giambamentus climàticus, Prodi at marcau chi is bogaduras de Co2 de is veturas europeas funt sceti su 1% de is bogaduras de totu is veturas presentis in su mundu.
Unu consìderu de fai est chi sa decisioni de su Parlamentu Europeu arribbat pustis de su disacatu de su Qatargate, cun sa cunfiàntzia me is istitutzionis europeas smenguada comenti mai prima, chi portat calincunu fintzas a pensai chi potzat essi una cosa fata a posta po favoressi sa Cina. Ma sena de andai deaici atesu puru aìnturu de s’Ue ddoi at calincunu – sa Germània – prus preparau de is àterus a custa mudadura e nd’at a essi favorèssiu. In contu de Germània, chi pensat mali pigat in consìderu un’àteru disacatu de una pariga de annus fait, est a nai su Dieselgate, chi pertocàt is valoris de is bogaduras de is veturas chi calincuna azienda tedesca iat trastocau. Pustis de cussu disacatu, narat ancora chi pensat mali, in Germània ant cumentzau a imbistiri meda po arremprasai is veturas a motori a abbruxamentu cun cussas elètricas.
Lassendi a una parti is arrexonus in contu de chini at a essi favorèssiu de s’arrocu de su motori a abbruxamentu, su chi is dudosus si preguntant est chi una decisioni comenti custa at a essi diaderus profetosa po s’ambienti. A is defensoris de s’ambienti prus arrabiosus giai no andat prus beni nimancu sa vetura elètrica. Est de su mesi de gennàrgiu passau s’arrelatu “Achieving Zero Emissions with More Mobility and Less Mining”, scritu de una truma de professoris de sa University of California. De cust’arrelatu si nd’at a chistionai meda in su benidori, ca est unu documentu chi benit de s’ambienti acadèmicu de sa California, est a nai su bratzolu de su movimentu de is defensoris modernus de s’ambienti. Ita narat s’arrelatu? Cosas chi in medas giai narànt ma chi no fiant tentas in contu poita beniant de genti chi no faiat parti de su movimentu de is defensoris de s’ambienti: no est berus chi sa mobilidadi elètrica no produsit bogaduras de Co2, ca unus cantu de partis de is veturas elètricas tocat a ddas produsi po mori de atividadis chi alluant meda. Pensaus a is mineralis chi serbint po fabricai sceti is baterias: arràmini, nichel, cobaltu, po ndi nai sceti calincunu. Sigumenti no fait a bogai de terra custus mineralis sena de alluai meda s’ambienti, mancai in Europa e in Amèrica de depositus ndi ddoi siant, ddus bogant me is stadus prus pòberus, est a nai in logus chi no s’impetzamentant po s’alluamentu. Sa matessi cosa incapitat po su traballu de is mineralis po fai is partis de is veturas elètricas. Sigumenti funt fainas chi alluant meda, ddas faint in Cina, ca in Europa e in Amèrica a is processus produtivus ddis tocat a arrespetai s’ambienti e po custa arrexoni costant de prus. Posta deaici sa chistioni est una chistioni de farsidadi, ca no est chi sigumenti s’alluadura dda faint in s’àtera parti de su mundu no esistat, est sceti chi no si biit.
Massimiliano Meloni
