Me is diis passadas s’Assessorau a su Turismu, Artesania e Cummèrtziu de sa Regioni Sardìnnia at presentau in su mentris de una cunferèntzia de imprenta su programma de ‘Sardigna Open’, unu torneu de primori chi, de su 1 a su 7 de maju, at a aberri sa stajoni tennìstica 2023 in Itàlia. Acabbau su torneu de Madrìd, unus cantu de is mellus tennistas de su tzircùitu at a sighiri duncas custa fasi, cara a is Internatzionalis BNL de Itàlia, in is campus de giogu de su Tennis Club de Monte Urpinu in Casteddu. “Sa Sardìnnia – at nau s’assessori regionali a su Turismu, Gianni Chessa – oramai est s’Ìsula de su sport. Seus avalorendi sa Sardìnnia cun 43 atòbius internatzionalis de sport chi po nosu no arrapresentant unu gastu ma un’investimentu. Immoi eus punnau a custu chi pertocat su tennis chi po tres annus at a essi protagonista in tzitadi e chi at a allonghiai fintzas sa stajoni stadiali”.
“Sardegna Open” at a essi difatis su de tres atòbius prus de importu de su Paisu in su 2023 impari a su de Roma e a su de Torinu. Un’àtòbiu stòricu po su tennis italianu e po su movimentu sardu, comenti dd’at definiu su presidenti de sa Federatzioni Italiana Tennis e Padel Angelo Binaghi, faendi fintzas una cumparàntzia cun manifestatzionis comenti a s’Eurovision o Sanremo, pruschetotu po su profetu, in contu de economia e publitzidadi, chi portant a su territòriu innui si faint. “Ca custas – at nau Binaghi –funt manifestatzionis chi sa televisioni mandat in sa bellesa de 209 paisus de su mundu. Su torneu chi Casteddu est aprontendi est particulari meda, ca seus fueddendi de su prus torneu mannu de sa stòria de su tennis sardu. No est de seguru unu torneu de reclamizu o de propaganda, e duncas tocat a ddoi traballai beni po fai a manera chi sigat in su benidori. Su tennis oi paris cun su padel est su segundu sport natzionali e tenit prospetivas diferentis cunfronta a su fùbalu. Su fùbalu difatis parit passendi-sì unu perìodu de crisi, in su mentris chi su tennis, invècias, est ammanniendi-sì. At a essi unu torneu de sighiri cun atentu mannu pròpiu po ddu biri cresci de annu in annu”.
Po su chi pertocat is tennistas, Paolo Lorenzi, su diretori tècnicu de su torneu, presentendi su programma at nau chi ant a podi liai parti a su torneu totu is giogadoris prus fortis e at a essi un’aprontamentu po su torneu de Roma. A pustis de Madrìd campionis medas ant a benni in Sardìnnia po lompi una cunditzioni mellus faci a is Internatzionalis. “Est unu spantu – at nau Lorenzi – chi su primu de custus torneus nous in Europa at a essi innoi in Casteddu. S’abetaus pùblicu meda”. Sa relata intra de Casteddu e su tennis est fintzas acapiada a su campioni Nicola Pietrangeli: “A mei m’iat a fai praxeri a tenni sa tzitadinàntzia onorària de Casteddu ca funt medas is arregordus chi m’acàpiant a custa tzitadi.
No totus sciint po nai chi po sa finali de sa Fed Cup de su 2013 nemus si boliat donai sa possibilidadi de dd’acasagiai in Casteddu e cun su presidenti Binaghi eus dèpiu gherrai meda po nc’arrennesci. A s’acabbu de is contus est stètia un’arrennèscida manna e ancora oi in medas si nd’arregordant e si bantant po cussa faina”. Sa matessi arrennèscida est sa chi is organizadoris isperant po su 2023 de su tennis italianu. A livellu fìsicu is tennistas italianus funt in crèscida. Sinner est ammostendi de tenni is piessignus de su campioni e oi est su giogadori italianu cun is prospetivas prus mannas. Totu su mundu dd’est arreconnoscendi.
Intra de is nòminis prus famaus chi iaus a depi agatai a “Sardegna Open” su croatu Borna Coric, is italianus Lorenzo Musetti, Lorenzo Sonego e Marco Cecchinato, s’argentinu Diego Schwartzman e is americanus Ben Shelton e Maxime Cressy.
Manuela Ennas
