Est in lìnia de su 3 de su mesi de donniasantu “Posidònia Team”, una sèrie po su web de 10 episòdius de pagu prus de unu minutu innui is protagonistas Marina, Emanuele e Giacomo presentant is caraterìsticas de sa “Posidonia oceànica” e de s’ecosistema innui crescit.
Sa “Posidònia oceànica”e est una genia de mata de mari, cun frutus e froris, chi agataus in su Mediterràneu, de sa famìlia de is Posidoniacee (angiosperme monocotiledoni) e tenit importu mannu po s’ecosistema de su mari. Perou, po mori de atzionis dannàrgias de s’òmini e sa mancàntzia de arrispetu po s’ambienti, custa mata est acabbendi po sparessi, portendi aici àterus dannus a su mari e a is costeras.
Sa Poseidònia dda cunsiderant unu bioinditatori de sa calidadi de is àcuas de is costeras ca sa preseèntzia sua bolit nai chi funt lìmpias e sanas, ca difatis no crescit si su logu est brutu o impestau. Sa mata est fintzas ogetu de stùdiu po totu is propriedadis profetosas e is impreus chi tenit.
Is vìdeus curtzus de su progetu difatis si contat comenti sa “Posidònia oceànica” e su chi abarrat firmu in s’arenàrxu, chi ddi narant is “banquettes”, siant de importu po amparai sa biodiversidadi de su mari e po smenguai is arriscus chi funt ponendi inperìgulu is costeras, su mari e totu is genias de animalis chi ddoi bivint.
Is traballus de sa serie web ddus ant cuncordaus Luca e Davide Melis, registas de sa sotziedadi Karel, po contu de sa Regioni Sardìnnia aìnturu de su progetu PosBeMed2 (Governance e gestioni de sistemas arenarxu- montixus de anei cun Posidònia in su Mediterràneu), ghiau de s’Assessorau po sa defensa de s’ambienti. Su progetu tenint unu finantziamentu de su Programma de Cooperatzioni Interreg Med po mori de su “Fondo Europeo di Sviluppo Regionale” (Fesr). Fait a sighiri sa sèrie in is canalis istitutzionalis e in retzas sotzialis de sa Regioni.
Manuela Ennas
