Sàbudu passau sa Rùssia at serrau, fintzas a candu no dd’at fatu sciri, sa retza de su gasu Nord Stream 1. Custa retza, chi arrugat su Mari Bàlticu, fait arribai me is Stadus de s’Europa nord-ocidentali, po primu sa Germània, 55 milliardus de metrus cubbus de gasu a s’annu.
Custa decisioni, chi fait parti de is strategias de sa Rùssia po cumbati is penas chi dd’at postu s’Europa po s’invasioni de s’Ucràina, at fatu artziai ancora de prus is prètzius de su gasu e, in dònnia manera, de s’energia. Bastat pensai chi cida passada a sa Bussa TTF de Amsterdam su gasu at superau sa cifra de 290 èurus a su megawatt/ora, cunfrontu a is 26 èurus de su 2021: una crèscia de casi su 1000%!
S’inflatzioni e sa spesa po s’energia, comenti faiat a pensai, funt una de is allegas de importu de sa campagna eletorali italiana. Su problema perou, e is solutzionis suas, pertocant totu s’Europa. S’inflatzioni de s’Eurozona in austu at lòmpiu sa cifra rècord de su 9,1% (datus Eurostat), a pustis de noi mesis de crèscia fitiana.
Segundu sa rivista ingresa Economist, una de is boxis prus de importu in contu de economia, est agiumai craru chi s’Europa est brintendi in recessioni, mancai no si sciat ancora cantu sa crisi at a essi grai. Po immoi, segundu su giornali ingresu, s’economia de s’Eurozona no at sunfriu meda sa situatzioni de dificultadi de custus mesis. Sa disocupatzioni no est artziada asuba su 6,6%, cosa chi po sa mèdia Europea bolit nai casi ocupatzioni prena, e is consumus no funt calaus meda mancai is consumadoris, de su cumintzu de sa gherra, apant pèrdiu meda spera in su benidori. Sa produtzioni industriali est abarrada in pei, mancai is prètzius artus, po mori de is òrdinis giai fatus prima de s’invasioni de s’Ucràina inghitzada su 24 de friàrgiu passau. In prus in su sud de s’Europa, puru in Itàlia, me in s’istadi su turismu at ammanniau sa crèscia.
Me is mesis chi benint perou is cosas ant a mudai. S’indùstria energètica est in dificultadi manna e sa produtzioni industriali s’at a smenguai ca is òrdinis nous funt giai calaus. Sa spesa de is consumadoris po is servìtzius at a calai (ddoi ant ai dificultadis mannas in su setori de is fàbbricus e in cussu de is trasportus). In prus a sa Banca Centrali Europea po cumbati s’inflatzioni dd’at a tocai a artziai is intaressus po imprestai su dinai. In custa manera su dinai at a balli e costai de prus e at a cumentzai a ddoi essi prus pagu dinai in giru e sa genti at a spendi de mancu.
Massimiliano Meloni
