Su bitcoin est una genia de criptovaluta, est a nai de dinai virtuali. Totu is criptovalutas funt scapiadas de s’averiguamentu de is autoridadis statalis e s’impreu insoru est spainendi-sì sèmpiri de prus intra de is consumadoris poita ddus atirat sa possibilidadi de guadangiai meda e in pagu tempus.
Seus chistionendi de dinai cuau poita no esistit in forma fìsica. Po custa arrexoni eus a podi pentzai chi no serbant medas resursas naturalis po dd u ingendrai e chi duncas siat una forma de dinai chi no alluat s’ambienti.
Invecis, comenti narat unu stùdiu de s’Universidadi americana de su Mèssicu Nou, imprentau pagu diis fait, su procedimentu po ingendrai bitcoins est dannàrgiu meda po s’ambienti. Segundu is studiosus, in contu de giambamentu climàticu, su ingendrai bitcoins tenit su matessi importu de sa bogadura a pillu de su petròliu e indiritura un’importu prus mannu de sa bogadura a pillu de s’oru.
Intra de su 2016 e su 2021, segundu su stùdiu, su fai bitcoins est costau unu dannu chi ddu stimant paris a 12 milliardus de dòllarus. Sa curpa est de sa tènnica po fai is criptovalutas, poita tocat a fai unus cantu de càlculus po mori de is tennologias informàticas. Po fai is càlculus chi serbint, is computeras impreant energia elètrica chi po sa parti prus manna (64%) dda produsint is combustìbbilis fossìlis. In custa manera, narant is studiosus, is bogaduras de anidridicarbònica po ingendrai bitcoins funt crèscias, de su 2016 a su 2021, de 126 bortas.
Is circadoris de s’Universidadi americana ant postu puru in relata su valori de mercau de is bitcoins e su valori de su dannu a s’ambienti in contu de bogaduras de anidridicarbònica. Is datus chi ndi bessint a pillu faint pensai meda poita ammostant chi me in su 2020 is dannus climàticus prodùsius po ingendrai unu bitcoin ant superau de su 50% su matessi valori de mercau de su bitcoin ingendrau. In prus, su costu ambientali de is bitcoins est in mèdia su 35% de su valori de mercau insoru.
Massimiliano Meloni
