Seus lompendi a sa data de su 14 de cabudanni, dì de su cumentzu de s’annu scolàsticu nou. A pustis de duus annus de apedèmia, chi ant sciumbullau is fainas scolàsticas, sa scola at a torrai a sa fini casi a sa normalidadi.
Su Ministeru de s’Istrutzioni, in unu vademecum de su 28 de austu passau, at donau calincunu ìnditu sceti po averiguai s’andamentu de su Covid e no prus po ddu cumbati. Po sa primu borta de su cumentzu de s’apedèmia is arrègulas ant a essi agualis po totu is òrdinis de scola, de sa pipiesa a su segundu gradu.
Me is scolas no s’ant a depi prus bistiri is mascareddas. S’impreu insoru perou est arrecumandau a is chi tenint problemas sanitàrius chi ddus faint prus dèbilis. No at a tocai prus a mesurai sa callentura a s’intrada de scola ca sceti is chi ant a tenni prus de 37,5 gradus ant a depi abarrai in domu.
A is alunnus chi s’intendint mali e portant tussi, arresfriu, dolori de conca, ddus ant a scerai de is àterus e ddus ant a acasagiai in un’àrea de sa scola assolada. Chi funt minoris de edadi, sa scola at a depi tzerriai luegu is babbus e is mammas, chi ddus ant ant a depi torrai a portai a domu. Is positivus a su test anticovid ant a depi abarrai in domu e ant a podi torrai a scola sceti a pustis de unu test negativu. Su Ministeru de s’Istrutzioni at acrarau chi po is positivus no ddoi at ai nisciuna forma de Dad, ca sa normativa chi dda pigàt in consìderu balliat sceti po s’annu scolàsticu passau. Custu disponimentu, mancu fait a ddu nai, at fatu nasci polèmicas meda.
In contu de sa gestioni de is chi ant atobiau personas impestadas, su Ministeru de s’Istrutzioni no donat àteras arrègulas in prus de cussas generalis donadas de su Ministeru de sa Saludi. Duncas no ddoi ant ai prus alunnus o classis in corantena. Is chi atòbiant genti impestada ant a depi sceti bistiri is mascareddas Ffp2 me is logus serraus o candu funt in mesu a ammuntonamentus de genti, finas a sa de dexi diis a pustis de sa data de s’ùrtimu atòbiu chi ant tentu.
Massimiliano Meloni
