Cun una faina detzididora po allebiai sa burocratzia, sa Sardìnnia nd’at bogau s’òbrigu de presentai su tzertificau mèdicu, candu si torrat a scola a pustis de cincu diis de ausèntzia, chi atestat chi su studianti est torra in saludi. Custa mudadura dd’agataus me is documentus acapiaus a sa Lei Finantziària, pubricada in custas diis passadas in su Bulletinu Ufitziali de sa Regioni Autònoma de sa Sardìnnia.
Custu providimentu nou punnat a sa chi naraus “semplificatzioni amministrativa” in su setori de sa sanidadi pùblica, est a nai su alligerai cussas proceduras burocràticas chi allònghiant is fainas, paris cun s’idei de melliorai is servìtzius sanitàrius in su territòriu regionali. Duncas immoi su tzertificau mèdicu chi pertocat sa maladia e sa cunditzioni de saludi po torrai a scola, tocat presentau sceti si est in lìnia cun is mesuras de profilassi stabilidas a livellu internatzionali e natzionali po arrexonis de sanidadi pùblica. Is pediatras ant a sighiri difatis a essi obrigaus a sinnalai maladias perigulosas e is dipartimentus de preventzioni de sa Asl ant a sighiri a ponni in atu totu is interventus netzessàrius po parai fronti a is arriscus po sa saludi pùblica:, averiguamentus chi fiant giai autònomus de s’òbrigu de su tzertificau po essi torra amìtius a scola.
Su Consillu Regionali duncas, aprovendi custa normativa at fatu unu passu de importu, po agiudai e melliorai siat is protzeduras sanitàrias comenti fiaus narendi, siat cussas scolàsticas chi a bortas faiant perdi diis in prus a is studiantis abetendi su tzertificau e sa disponibilidadi de su dotori a ddu fai. S’arreforma difatis dd’ant acòllia cun favori puru is assòtzius de is pediatras, chi fiant pedendi de meda custu giambamentu. Sa tarea e sa spera est fintzas cussa de evitai de tenni is ambulatòrius prenus de babbus e mammas cun sa netzessidadi de otenni su tzertificau po fillus chi mancai funt sanaus giai de una bella pariga de diis. In prus custu provedimentu agiudat a no fai torrai a scola prima de su tempus pipius chi no funt ancora sanaus beni, comenti incapitat meda, sceti po straviai s’òbrigu de su tzertificau.
A essi cuntentas meda de custu giambamentu e de s’importu de custa novidadi, funt Camilla Soru e Giulia Andreozzi, cunsilleras comunalis de Casteddu, chi iant fatu sa proposta giai noi mesis fait, ocupendi-sì de sa chistioni e promovendi in su mesi de gennàrgiu passau un’atzioni polìtica ananti a s’Assessorau regionali de sa Sanidadi po pediri prus atentu po su traballu de is pediatras e po annuddai s’òbrigu de su tzertificau po torrai a scola a pustis de is cincu diis de ausèntzia. Immoi chi sa lei intrat in fortza, impari a issas, chi funt arrennèscias a biri acumpridas is tareas insoru, ndi funt cuntentus is dotoris e is babbus e mammas chi no ant a essi prus obrigaus a tenni in domu is fillus oramai sanaus, abetendi custu tzertificau o a ddus fai torrai a scola prima de is cincu diis mancai maladiòngius, po fai de mancu de andai in ambulatòriu po su tzertificau.
Sa Sardìnnia no est s’ùnica regioni chi at lòmpiu custu arresurtau e antzis est de meda chi àteras regionis italianas ant aboliu s’òbrigu in acòrdiu cun is pediatras. In is maladias chi impestant difatis, su perìgulu de impestu est mannu me is diis candu est incubbendi e candu cumparrint is primus acinnus, mentras arresurtat smenguau in su perìodu de allebiadura fintzas a essi giai giai annuddau a pustis de cincu diis de su cumentzu de sa maladia, aici bàsciu de permiti sa presèntzia in mesu a is àterus. Su tzertificau dd’iant giai burrau in ùndixi regionis e provìntzias autònomas: Lombardia, Piemonte, Friuli-Venètzia Giùlia, Ligùria, Provìntzia de Trentu, Provìntzia de Boltzanu, Emìlia-Romagna, Umbria, Marcas, Làtziu, Vènetu e Toscana. Arregordaus chi sa matèria est de cumpetèntzia legislativa de is Regionis.
Manuela Ennas
