A cantu parit s’Itàlia est aprontendi-sì a s’istadi in sa mellus manera. S’Enit difatis fueddat de s’arribu de sa bellesa de 1.844.000 passigeris aeroportualis, cun una percentuali de s’84% de orìgini internatzionali e de su 16% de orìgini italiana. In su mesi de làmpadas iant a depi essi 944 milli is arribus, cun una crèscida de su 8,6% cunfronta a s’annu passau. Giai me is primus tres mesis de su 2023 is sinnialis ammostant arresurtaus spantosus: intra de gennàrgiu e martzu 2023, su turismu internatzionali est crèsciu de su 86% respetu a su matessi perìodu de su 2022, ca ant biaxau a s’èsteru 235 millionis de turistas.
Is biaxadoris internatzionalis in Itàlia funt sa bellesa de 15 millionis, cun una crèscida de su 42% cunfronta a su 2022 e un’arrecùperu de su 87,7% cunfronta a su matessi perìodu de su 2019. Is turistas sceberant s’Itàlia mescamenti comenti logu po si gosai is fèrias (giai su 30% de is biaxadoris) e po arrexonis de traballu (21,4%), ma fintzas po andai a agatai sa famìlia e is amigus (14,6%) e po comporai e fai afàrius (11,8%). De custus, su 71,7% lompit de is Paisus de s’Unioni Europea, pruschetotu de Frantza e Germània. S’àteru 18,3% lompit de s’àrea extra-europea, mescamenti de su Rènniu Uniu. Sighit a cresci puru su nùmeru de is turistas italianus, mancari prus a bellu. In istadi sa crèscida iat a depi essi de su 3,3%, cun prus de 111,6 millionis de presèntzias postas in contu. Duncas custa istadi iat a depi smenguai sa diferèntzia intra is duas partis prus mannas de su mercau: su tanti de sa rechesta italiana est a su 52,4%, contra su 47,6% de sa rechesta èstera.
“Is datus po sa stajoni istadiali incorant meda e ammostant una crèscida de sighida de su setori chi incarrerat a propassai is nùmerus de su 2019, innantis de s’apedèmia de Covid”, at nau sa Ministra de su turismu Daniela Santanchè. Sa Ministra nd’ at fueddau me is diis passadas in sa Sala Orlando de s’Unioni de is Cummertziantis de Milano, in su mentris de s’atòbiu “Il turismo in Italia, patrimonio valoriale e leva di sviluppo per la nazione” apariciau de s’Òrdini de is Dotoris Cummertzialistas paris cun s’Òrdini de is Abogaus de Milanu. “S’Itàlia est lompendi arresurtaus nodius , eus a tenni un’istadi profetosa e una torrada de totu is flussus internatzionalis e custu punnat a melliorai s’oferta turìstica” at nau Ivana Jelinic, presidenta e ghia CEO de ENIT.
Duncas is abetus, is prospetivas po su tempus imbenienti in contu de turismu internatzionali, pruschetotu po is mesis chi incarrerant sa stajone istidiali, andant meda prus a innantis de cussas formulaus po su 2022. Naraus chi su 70% de is spertus s’abetant arresurtaus mellus pruschetotu po is biaxis intra de maju e austu. De custus spertus perou su 19% est dudosu e no s’intendit aici seguru. Una cosa chi tocat a tenni in contu e chi at a essi detzididora est su chi naraus “raportu calidadi-prètziu”, cun prus atentu a sa spesa e fintzas a sa distàntzia de domu a su logu sceberau po is fèrias. S’Itàlia sighit a praxi meda a is americanus. Su mercau de provenièntzia prus mannu est pròpiu su de is Stadus Unius. Is passegeris chi lompint de innia a aparèchiu funt asumancu su 26,3% de su totali èsteru chi abetant me is tres mesis de s’istadi. Sighint is passegeris de sa Frantza cun su 6,1% e de sa Spànnia cun su 4,7%, chi impari funt giai su 11%. Intra de is biaxadoris chi benint de Paisus a s’àtera parti de s’oceanu nci funt is de s’Austràlia a su de cincu postus cun su 4,1%, is de su Canadà a su de seti postus cun su 3,8%, e sighint is de su Brasili cun su 2,8%, is de sa Corea de su Sud cu su 1,9% e is de s’Argentina cun su 1,7%. Is aeroportus chi ant acolli prus turistas internatzionalis ant a essi cussus de Milano e de Roma Fiumicino Segundu is datus po immoi is turistas, po is primus tres mesis de s’istadi, funt sceberendi su turismu in logu de lagus,po su 36,2%, in logu de mari po su 33,7%, in tzitadis de arti po su 33,1%. Sighint su tursimu in logu de monti po su 30,2% e in logu de àcuas termalis po su 27%.
Manuela Ennas
