A partiri de is eletzionis polìticas imbenientis, s’edadi mìnima po votai po su Senatu de sa Repùblica at a essi sa matessi chi serbit po votai po sa Càmera de is Deputaus: 18 annus e non prus 25. S’arrexoni de custu giambamentu est s’intrada in fortza, su 4 de onniasantu passau, de sa lei costitutzionali n. 1/2021. Semus fueddendi de una rivolutzioni, mancai pitica, poita su lìmiti de edadi de 25 annus esistiat de su 1948, annu de s’intrada in fortza de sa Costitutzioni italiana.
At a tocai a biri cantu custa novidadi at a serbiri a fai acostai is giòvunus a sa polìtica, ca po issus est difìtzili meda a intrai me is istitutzionis e abasciai a 18 annus s’edadi po eligi is senadoris non mudat meda sa situatzioni. Mancai a 18 annus in teoria fait a essi sìndigus de una tzitadi manna fintzas comenti a Roma, candu passaus de sa polìtica locali a cussa natzionali is cosas funt diferentis. Difatis is Deputaus e is Parlamentaris europeus depint tènni a su mancu 25 annos, is senadoris 40 e su Presidenti de sa Repùblica inderetura 50.
A foras de s’Itàlia sa situatzioni est diferenti. In 14 Stadus de s’Unioni europea, comenti a sa Frantza, a sa Germània e a s’Ispagna, bastant 18 annus po fai is parlamentaris europeus. In 10 Stadus, comenti a su Bèlgiu e a s’Irlanda, bastant 21 annos. Sceti in Grètzia e in Itàlia tocat a tenni a su mancu 25 annos. In Itàlia sa polìtica decidit unus cantu de cosas chi pertocant is giòvunus, ma is giòvunus non pigant parti a su processu de decisioni. Chi pigaus in consìderu calincuna boxi de sa spesa pùblica bieus chi is generatzionis prus giòvunas tenint arrexoni de si chesciai.
Su dèpidu pùblicu italianu est intra de is prus artus de Europa e s’Itàlia spendit su 4 per cento de su Pil po pagai is interessus asuba de is dèpidus fatus me su tempus passau. Custa percentuali, chi est paris a 70 milliardus de èuros a s’annu, est prus arta de sa spesa po s’Istrutzioni, chi est paris a su 3,9% de su Pil (datus Eurostat 2019). In Europa faint peus sceti sa Romania (3,6%) e s’Irlanda (3,1%).
Fintzas sa spesa po is pensionis in Itàlia est intra de is prus artas de Europa e est paris a su 16,5% de su PIL (datus Eurostat 2015): prus de cuàturu bortas sa spesa po s’Istruzioni. A custa cosa tocat a aciungi chi po is giòvunus su traballu est sèmpiri prus de paga dura e is stipèndius funt prus bàscius de cussus chi podiant pigai is babbus e is mammas insoru. Po custu non depit parri spantosu chi funt sèmpiri de prus is giòvunus chi andant a bivi in unu Stadu stràngiu. Sèmpiri segundu Eurostat, in su 2016 su 76 per cento de is italianus chi funt andaus a bivi a fora de s’Itàlia, teniat prus pagu de 40 annos. Po fai acostai is giòvunus a sa polìtica forsis at a serbiri meda de prus de abasciai s’edadi de votu po su Senatu.
Massimiliano Meloni
