Oe pro sa rubrica Lapis apo a adobiare unu personàgiu intra de is prus connotos e istimados in totu su mundu. Unu personàgiu chi at marcadu unu tretu de importu in su mundu de s’arte dae cando ddoe est imbucadu a s’acabbu de s’ Otighentos. So faeddende de Vincent Van Gogh, òmine e artista ispantosu chi nos at donadu emotziones fortes cun is òberas suas. Dd’agato in s’aposentu de letu suu, chi connoschimus bene ca dd’at pintadu, est a barba longa, cun s’origra trogada e sa paglieta in conca…
Salude Vincent, comente andamus?
Eh…Semper unu pagu impensamentadu, no agato mai assèliu a intro de mene…
Però est semper renèssidu a ddu batire subra de sa tela custu tormentu. Calicunu narat chi is pinzelladas suas siant pròpiu su resurtadu de custu naturale arragasciosu.
De seguru su de pintare est istadu una manera pro proare a ddu bìnchere.
Cando at cumentzadu a pintare e cumprèndere chi diat èssere istadu de agiudu?
Nointames calicunu nàrgiat chi apo comintzadu a mannu, apo semper disegnadu, de cando fia minoreddu. Babbu meu fiat contràriu, mi obrigaiat a sighire règulas severas meda, ma deo fia semper cun sa lapis in manu finas a cando apo detzìdidu de devènnere unu pintore berdaderu.
Dae ue nde benit custa passione pro sa pintura?
Nde benit dae s’amore pro is colores. Non dia pòdere bìvere sena colores, non renesso a imaginare unu mundu sena colores. Sa vida mea est semper istada una chirca de su colore, de is acòrdios e de is cuntrastos intra de colores,de su giariscuru, de is isfumaduras , de comente a sa lughe renessat a donare un’àtera bisura a is colores, a ddos mudare, a ddos allùere.
Unu pagu comente a cudda lughe chi illùminat sa mesa in ue màndigant is suos “Papadores de patata”?
Sissi..Cudda lughe m’at permìtidu de ddos pintare in unu mamentu pretzisu, rendende onore a su traballu insoro, a sa pelea insoro. Su mundu de is messajos m’at semper ammajadu. Cudda vida simple casi aspra, unu mundu gasi diferente, e de seguru mègius, de cuddu tzivile in ue fia acostumadu a bìvere deo.
Ite diat cussigiare a is chi cherent cumprèndere is òberas suas?
Deo ddis dia nàrrere de s’acurtziare cun canta prus libertade tenent in is sentidos, sena s’òbrigu de cumprèndere a marolla ite apo chèrfidu rapresentare o contare. Cun is colores, su pinzellu, sa lughe e cudda dose mea de amargura e de patimentu non fatzo àteru chi ammesturare custos elementos e ddos manigiare pro cuncordare un’imàgine. Posca ognunu de nois at a ischire bìdere a segundu de sa sensibilidade chi tenet. Naramus chi no est de importu su trastu chi pinto ma ite custu trastu est capassu de ingendrare. No est su chistionu in contu meu chi contat cantu su meledu chi nde essit a pillu in is pensamentos de chi càstiat is òberas meas.
Vostè ddu tenet unu trastu chi ddi praghet meda a pintare?
Nossi, unu prus de is àteros nono…mi praghent su sole, is frores, is matas, su bentu, is caras…ma pruschetotu comente fia narende in antis est sa lughe chi non podet mancare, mancari siat in unu furrungoni de s’òbera.
Est pro sa lughe chi ddi praghet meda su grogu?
Incapas emmo. Su grogu mi praghet dae semper, de ogni sfumadura siat. Su grogu est in totue, in su sole, in su limone, in is isteddos, in su trigu, in su poddine, in ue ddoe at vida. Est capassu pròpiu de prenare de lughe ogni cosa.
E su scuriu, su note? Ddi faghent a tìmere?
Nono, antzis a bortas su sero, su note mi parent prus biatzos de sa die. No est chi sa lughe non ddoe siat, est cuada petzi…E mi praghet a dda fàghere essire a pillu. E in prus a su note faghet a scerare cosas prus dilicadas, cussas chi a de die mancu tenimus in cunsìderu. Su note est fintzas poesia, mudìmine, soledade…Totus elementos chi agiudant unu pintore a bìdere mègius su coro de is cosas…
Vostè dd’ischit cantu est famadu in totu su mundu?
Custa cosa mi faghet praghere ma mescamente ispero chi si siat cumprèndidu cantu sacrifìtziu ddoe at a palas de su traballu meu. Deo apo patidu meda in sa vida, tempus longu de esaurimentu nervosu, tristuras, doloris…Ma s’arte tenet unu podere mannu, ca nos permitit de ddos contare e de ddos ammoddiare in carchi manera.
Chie est istadu su primu a crèere in vostè?
Su primu est istadu Theo, frade meu…Issu m’at agiudadu meda, a s’ora de su bisòngiu. Ddi depo torrare gràtzias pro cosas medas…Fintzas pro custu pane e custu late (funt subra de sa mesa). Est cosa mala sa fàmine…
Ma custu cosa de s’origra? Ite est incapitadu?
Cussa borta fia imbriagu meda, ca a bortas bufamus pro nos ismentigare sa tristura. Fiamus chertende cun Gauguin…In cussos tempos istaìamus in Arles, in sa matessi domo. Ma fiat difìtzile a bìvere in pare, pro neghe sua e pro neghe mea puru…Duos naturales chi…agitòriu! Issu aiat detzìdidu de si nche andare, de mi lassare a solu, e a mene mi nche fiat artziadu su sàmbene a conca. E nudda, mi so segadu s’origra pro s’arrennegu, unu machìmine…
Pro acabbare, mi ddu narat a ite est traballende in custas dies?
Est unu cuadru chi no ais a bìdere…So pintende unu frore nodidu chi tenides in Sardigna puru,unu frore chi donat unu colore grogu a totu…Est su tzafaranu, una prenda de oro, chi donat lughe, cudda lughe chi ancora so chirchende.
Tastadu dd’at in su màndigu?
Nossi, ddu depo proare ancora.
Insaras gei si ddu intrego cun Theo…Gràtzias meda Vincent.
Gràtzias a tie…
Manuela Ennas
