Oe mi so posta in conca de adobbiare a unu personàgiu chi est giai faghende·mì amachiare, ca non renesso a dda sighire. E in prus issa non chistionat e duncas depo cumprèndere comente amus a fàghere. Deo apo portadu paperi e lapis pro ite issa est acostumada a iscrìere in cartellos su chi est pensende, mancari at a respùndere a is preguntas meas in custa manera. Est unu de is personàgios rpus famados de su mundu de s’animatzione, protagonista de sèries televisivas de animatzione e fintzas de pellìculas pro su tzìnema. A nàrrere sa beridade a custa figura dd’aiant pensada pro is tìtulos de sa sèrie de pellìculas de su regista americanu Blake Edwards.Ma in pagu tempus est lòmpida una renèssida chi nemos diat àere pensadu. Immoe chirco de dda firmare chi est andende dae una parte a s’àtera, paret gioghende a incaracua. Chi bos naro chi su piessignu suo est su colore? Unu colore chi est in su nòmine suo e dd’at fata connòschere in totu su mundu. Ajò, est simple! So faeddende de sa Pantera Rosa…
Salude, acosta ca mi ses faghende giai trumentare. Deo non so làngia comente a tie…
(Est chirchende unu lapis, ddi lasso su meu, e immoe est iscriende a palas de unu cartellu de publitzidade)
Salude a tie. Deo non mi firmo mai. Petzi pro dormire. Ma fintzas cando dormo tèngio semper un’ogru abertu!
E mi nde so acatada ca no abarras firma nudda nudda. Ascurta pro primu cosa conta·nos unu pagheddu de tue, de cando ses nàschida
(Torrat a pigare su lapis, ma est giai pensende a calchi àteru mabiori de fàghere)
In su 1963, su regista Edwards in su mentres chi fiat acabbende sa cummèdia sua cun protagonista Peter Sellers, aiat pensadu de pònnere in sa pellìcula una secuèntzia animada, naramus pro acumpangiare su cùrrere de is tìtulos de conca. E tando aiat pedidu a una truma de animatzione de imbentare calicuna cosa.
E nde ses essida a pìgiu tue?
(Immoe est iscriende in su cartolàriu meu chi in su mentres m’at furadu de sa bussa)
Isco chi aiant chèrfidu imbentare unu personàgiu cun s’elegàntzia de Cary Grant e su naturale impertinente de James Dean e fintzas cun sa manera de fai ingestos de Buster Keaton. Aiant seberadu de donare custas caraterìsticas a unu felinu chi si moviat sighende su rìtimu de sa mùsica iscrita dae Henry Mancini. E chie podiat èssere mègius de mei?
Cussa mùsica dda connoschimus bene. Est intrada in sa vida de totus…
(In su mentres est istrochende a issa e totu camminende)
Ma tue ses mascru, portas unu nòmine de fèmina e ses a colore de rosa? Ti ses agatadu bene cun custos piessignos?
(Est faghende unu risitu de cussos chi mustrant totu is dentes)
Emmo, deo no apo mai tentu problemas. Custos sunt pregiudìtzios de is òmines. Deo so deo pro totu custos elementos in pare. Chi essere nieddu comente totu is àteras panteras, in ue diat èssere istada sa novidade? E is pipios cun mei non tenent bisòngiu de fàghere diferèntzias e imparant a tènnere respetu de totus, sena de s’intèndere obrigados a scerare pro su gènere.
E in prus chi ddu narat chi su colore de rosa non deghet a is òmines?
(Immoe est pipende una zigareta…)
Difatis, est unu colore ispantosu. Càstia comente est nodida sa pellitza mea. E càstia sa cara mea, cun custu nasu ruju a forma de triangulu, is origras tundas, is ogros grogos, e càstia is cambas longas chi tèngio, e sa coa… Si essere nieddu diat pàrrere una ratapignata gigante. Gasi is pipios, imbetzes de m’istimare, mi diant àere fintzas tìmidu.
Ma, nara sa beridade, ti praghet de prus a èssere ispassiosu o a dirbetosu?
(Immoe s’est cuadu a suta de unu tapetu e est iscriende in terra)
Ma no est sa matessi cosa? Ah! Deo m’ispàssiu gasi, ma no est pro male chi fatzo dirbetos, est pro m’ispassiare e pro fàghere ispassiare a bosàteros, ca sa vida giai est iscura e trista e bi cheret unu pagu de colore, o nono? E mègius de su colore de rosa ite b’at? Fintzas su èssere unu pagu polèmicu, su de abetiare, est una manera pro intrare in chistiones e connòschere is àteros e su mundu.
Sigumente non tèngio gana de m’apichedare cun tue subra custa mata, tocat a nos saludare, fintzas ca depo andare a bùtega a comporare su mandiari pro sa chena de notesta
Insaras chèrgio bènnere cun tue. Cando b’at cosa de papare sa Pantera Rosa est semper pronta. Ma mi potzo sètzere in su carritu comente faghent is pipios?
Ma si ses prus arta de mei?
Pagu bi cheriat eh!
Manuela Ennas
