Est sa primu borta in sa storia chi unu tzitadinu de sa Repùblica Populari Tzìnesa lompit su tìtulu de campioni mundiali de scacus. Ddi narant Ding Liren, tenit 30 annus, est originàriu de Wenzhou, su bincidori de su Campionau mundiali chi s’est acumpridu su 30 de abrili in sa tzitadi de Astana, capitali de su Kazakistan. Su tzinesu at bintu contras a su russu Ian Nepomniahtchi, chi fiat su favorèssiu. A pustis de una filera de partidas cumintzada su 9 de abrili passau is duus aversàrius si fiant agataus in paridadi a sa vigìlia de sa finali. A pustis de ai fatu patas is primus tres partidas de sa finali , Liren in s’ùrtimu atòbiu de is cuàturu sparègius a tempus s’est fatu balli candu ammancàt pagu prus de unu minutu a s’acabbu, stabilendi aici unu record nou po sa Tzina.
Comenti at bintu su campioni no at pòtziu fai de mancu de dedicai luegu etotu sa bìncida a sa mamma, a s’ajaju, a sa famìlia e a is amigus, chi dd’ant sèmpiri alentau a sighiri custu sport. A is microfonus de is giornalistas chi dd’ant intervistau at nau chi immoi si ndi boli bogai unu disìgiu chi tenit de meda, est a nai, su de andai a Torinu po biri una partida de sa Juventus, sa truma de fùbalu chi tenit in su coru. Ding at contau chi at imparau a giogai a scacus de candu teniat cuàturu annus e chi nd’at passau àterus 26 gioghendi e analizendi partidas, circhendi de melliorai is abilidadis, impreendi tènnicas diferentis e imparendi de is mellus maistus e giogadoris. Ding at ammostau fintzas de essi amodau narendi chi in su mentris de su Campionau no fiat pensendi a ndi essiri campioni de su mundu ma a essi, pruschetotu, su chi giogàt mellus, po torrai is onoris a custa disciplina sportiva chi arrapresentat sa parti prus funguda de s’ànima sua.
Ding est unu giogadori unu pagu bregungiosu, capassu de apoderai beni sa cuncentratzioni, garbosu cun is aversàrius, ma cun unu giogu chi mudat a bellu a bellu fintzas a si fai perigulosu, tanti chi, fueddendi de su stili chi tenit , in unu giassu internet dedicau a is scacus, dd’iant annomingiau su “mortori sulenu”. Me is ùrtimus tempus sa nomea sua est crèscia e funt in medas, preuschetotu giòvanus, a ddu stimai in sa comunidadi de is scachistas. A sa noa de sa bìncida de Ding is scachistas prus traditzionalistas invècias no funt cuntentus meda ca issu at pòtziu liai parti a su Campionau de Astana sceti poita ca su campioni de s’annu passau, su norvegesu Magnus Carlsen, at renuntziau a amparai su tìtulu chi teniat de su 2013 narendi, in pagus fueddus, chi no intendiat prus sa punna a giogai cun is arrègulas e sa fòrmula atualis. Carlsen, chi abarrat su nùmeru unu de sa graduatòria internatzionali, mancai no apat bòfiu liai parti a su Campionau mundiali, est stètiu intra de is primus a fai is norabonas a su bincidori, cun unu messàgiu intregau in Twitter innui at ammostau apretziamentu po sa movidura spantosa de sa Turri chi at cambiau sa sorti a sa partida.
Est duncas sa primu borta chi unu giogadori tzinesu lompit a conchistai su tìtulu de Campioni mundiali de scacus assolutu, chi in passau ant bintu personàgius comenti a Mikhail Botvinnik, Robert Fischer, Anatoly Karpov, Garry Kasparov, chi funt una legenda fintzas po is chi no funt giogadoris o amantiosus de su “giogu nòbili”. Perou po unus cantu spertus chi averìguant su mundu de is scacus, fiat sceti una chistioni de tempus. Difatis est a su mancu de una cuindixina de annus chi de sa Tzina funt arribendi maistus de livellu artu meda e in su 2022 sa natzionali at bintu su mundiali a scuadras. Arrexonu diferenti po is fèminas ca is giogadoras tzinesas funt giai reinas de sa scachiera. In su mesi de argiolas chi benit sa campionessa Ju Wenjun at a giogai contras a Lei Tingjie, chi at giai bogau de mesu sa cunnatzionali Tan Zonghyi in sa finali de su torneu de cualificatzioni.
Manuela Ennas
