Pustis duus annus acabbat su stadu de apretu acapiau a su Covid 19. De su primu de abrili difatis at a intrai in fortza su decretu lei chi su guvernu Draghi at aprovau su 17 de martzu passau po superai custa situatzioni. Su decretu tenit sa tarea de torrai a portai a bellu a bellu s’Itàlia a sa normalidadi e is provedimentus pertocant totu is setoris de sa vida pùblica e sociali.
Bieus is novas prus de importu in contu de scola. Su decretu po primu cosa mudat sa gestioni de is alunnus positivus. Finamenti, pustis totu is polèmicas de custus duus annus passaus, is classis no ant a andai prus in Dad, nimancu cussas cun cuàturu o prus positivus. In prus, impari a sa Dad sparessit puru sa corantena po is chi funt intraus in cuntatu cun unu positivu.
Nimancu is positivus, chi ant a abarrai in domu insoru, ant a andai in Dad ca, comenti narat su decretu, ant a sighiri is letzionis po mori de sa Ddi, sa “didàtica digitali integrada”.
Sigumenti sparessit sa corantena, is cumpàngius de classi de is positivus, chi no funt positivus issus puru, ant a sighiri a andai a scola. Is alunnus chi tenint prus de ses annus (totus, a parti cussus de sa scola de is pipius) ant a depi portai is maschereddas ffp2 po dexi diis de s’ùrtimu cuntatu cun is positivus.
Is positivus, prima de torrai a scola, depint fai su test anticovid. Su test s’at a podi fai fintzas in domu, ma at a tocai autocertificai s’arresurtau negativu. S’òbrigu de tenni is mascareddas in classi, a su mancu cussas chirùrgicas, at a abarrai fintzas a s’acabbu de s’annu.
In contu de abarrai atesu s’unu de s’àteru, su guvernu arrecumandat sa cosa, mancai custa no siat prus un’òbrigu. Comenti prima, no at a fai a intrai in scola cun prus de 37,5° de callentura.
Un’àtera nova de importu est chi de su primu de àbrili s’ant a torrai a podi fai is vìsitas a foras de sa scola, is biàgius de istrutzioni e is manifestatzionis sportivas. De su primu de maju at a acabbai, po is personas chi no traballant in sa scola (duncas babbus e mammas puru) s’òbrigu de tenni su Green Pass po intrai in scola.
Po su personali de sa scola invècias, fintzas a su 15 de làmpadas abarrat s’òbrigu de vacinatzioni (tocat a tenni su super Green Pass).
Massimiliano Meloni
