Cida passada is autoridadis europeas chi averìguant su setori finantziàriu (Eba, Esma e Eiopa) ant postu in pentzamentu is arrispramiadoris asuba de is perìgulus chi currint, investendi me is criptovalutas, est a nai su dinai virtuali.
Custa pràtiga est spainendi-sì sèmpiri de prus intra de is consumadoris poita ddus atirat sa possibilidadi de guadangiai meda e in pagu tempus.
Is tennologias digitalis noas funt ocasionendi una mudàntzia funguda de s’economia globali. In su setori finantziàriu unu de is impreus prus de importu de custas tennologias est pròpriu sa nàscida e sa spainadura de is criptovalutas comenti su bitcoin, chi est forsis sa prus connota.
Is criptovalutas funt dinai cuau, poita ddu podit biri e impreai sceti chi connoscit unu còdixi informàticu precisu. Faint parti de una categoria de dinai chi no esistit in forma fìsica, ma est ingendrau e scambiau sceti po mori de is retzas telemàticas.
Chi is partis de unu scàmbiu funt de acòrdiu, fait a scambiai is criptovalutas po comporai benis e servìtzius. Su scàmbiu est fatu inderetura intra de duus mèdius eletrònicus chena abisòngiu de medianeris. Sigumenti fait a produsi sceti unus cantu de dinai virtuali, cantu prus acòrdius funt fatus in criptovalutas, prus custas ballint.
Tocat a nai chi su dinai virtuali no est arreconnotu in casi nisciunu Stadu de su mundu e duncas is chi ddu impreant ddu faint in manera voluntària.
Investiri in criptovalutas, po is autoridadis europeas, no est cosa po totu is arrispramiadoris, ca est fàcili arribai a perdi totu su capitali investiu. Is perìgulus funt acapiaus a informatzionis frassas apitzus de su dinai virtuali, a sa dificultadi de cumprendi custas fainas e pruschetotu poita in custu setori no ddoi at nisciuna seguresa. Is criptovalutas no funt seguras poita no ddas arrègulant is guvernus ma ddas bogant e ddas averìguant entis privaus, detzidendi e sighendi is arrègulas insoru.
Po is autoridadis europeas de guardiania, pròpriu custa cosa de essi a foras de dònnia controllu, est su perìgulu prus mannu po is arrispramiadoris poita deaici no tenint nisciuna seguresa de amparu.
Massimiliano Meloni
