S’annùntziu chi pertocat s’Ìsula est pro su 30 de làmpadas. Perunu degòlliu in programma, pro more ‘e Deus siat! Ma su die amus a bìdere comente funtzionat su sistema IT Alert de allarme pùblicu chi sunt isperimentende dae unos cantos meses pro chi s’artis-artis nche potzat lòmpere deretu a sa populatzione pro mèdiu de sos telefoneddos. A ora de mesudie, bastis chi siat inchesu e chi b’apat campu («potrebbero non suonare se con suoneria mutata»), su telefoneddu at produire unu sonu pro chi fatu-fatu potzamus lèghere su messàgiu
AVVISI DI EMERGENZA. IT-Alert. Questo è un MESSAGGIO DI TEST del sistema di allarme pubblico italiano. Una volta operativo ti avviserà in caso di grave emergenza. Per informazioni vai sul sito www.it-alert.it e compila il questionario
In italianu, naturale. E fintzas in inglesu. In sardu diat pòdere torrare deasi.
AVISOS DE EMERGÈNTZIA. IT-Alert. Custu est unu MESSÀGIU DE PROA de su sistema de allarme pùblicu italianu. T’at a avisare in casu de emergèntzia grave una bia operativu. Pro àere info a minudu bae a su situ www.it-alert.it e compila su cuestionàriu.
Custu est su calendàriu de su test, cun su 30 pro nois, duas dies in antis in Toscana, su de trìulas in Sitzìlia, su 7 in Calàbria e su 10 in Emìlia Romagna. «Intro de sos concruos de su 2023 – leghimus in su situ – ant a èssere interessadas dae su test àteras Regiones e sas Provìntzias autònomas de Boltzanu e de Trentu». Pro seguru in cue l’ant a retzire finamentas in tedescu, e custa est cosa chi interessat a chie inoghe gherrat pro su bilinguismu finamentas in custa casta de tecnologias.
A custu sistema l’ant testadu sa prima borta in intro de s’esertzitatzione “Vulcano 2022” in s’isuledda omònima dae su 7 a su 9 de abrile de s’annu coladu. Tando imbieint a sos dispositivos de sos abitantes de sa localidade duos messàgios: su primu cun informatziones chi pertocaiant s’erutzione imbeniente (totu finta) e sos cumportamentos de sighire (comente sos tretos a ue nche lòmpere movende dae su pianu de Protetzione tzivile); su segundu avisende de sos concruos de s’annestru.
Posca, dae su 4 a su 6 de santandria de su 2022, est tocadu a prus de 500mìgia persones de 22 Comunes costerinos de Sitzìlia e Calàbria in intro de s’esertzitatzione “Sisma dello Stretto 2022”. Inoghe e tando ant pòdidu isperimentare IT-alert pro s’arriscu de maremotu (pro more de unu terremotu simuladu de magnitudu 6.0 cun epitzentru in provìntzia de Reggio Calabria).
Sos messàgios IT-alert biàgiant in modalidade cell-broadcast e lompent a cada dispositivu mòbile connètidu a sas tzellas de sas retes de sos operadores de telefonia. Pro more de custa tecnologia sos messàggios IT-alert podent èssere imbiados in intro de unu grupu de tzellas telefònicas de su matessi tretu geogràficu, delimitende un’àrea chi currispondet pagu prus o magu a sa chi est interessada dae s’emergèntzia.
Sos arriscos inditados in su situ de su dipartimentu natzionale de sa Protetzione tzivile sunt su sìsmicu, su mèteo-ìdricu, su vulcànicu, su sanitàriu, s’ambientale, su nucleare, s’industriale ma finamentas sos chi pertocant sos maremotos giai mentovados e sos fogos in sos padentes. Unos cantos caraterizant s’ìsula nostra, àteros nono, àteros nos diant pòdere interessare.
De cada manera sa punna est sa de afiancare sos sistemas de allarme chi giai connoschimus a livellu istatale, regionale e locale pro chi, arribende su messàgiu deretu a sos tzitadinos, si potzat àere un’amparu prus mannu minimende s’espositzione individuale e colletiva a su perìgulu.
A tales chi su test funtzionet e sos messàgios los retzamus non b’at bisòngiu de iscarrigare aplicativu perunu. Pro carchi telefoneddu diat pòdere èssere netzessària in antis una verìfica de sa configuratzione sua si b’at àpidu unu riprìstinu de back up o si semus impreende una versione betza de su sistema operativu.
Mauro Piredda
