Est de pagu tempus chi seus bessius de s’apedèmia de Covid, e cun s’acabbu de s’òbrigu de bistiri is mascareddas parit de ai lassau a palas s’apretu.
Is spertus perou no ant mai smìtiu de cunsillai a sa genti de donai atentu, ca cun s’arribu de s’atòngiu sa situatzioni iat a podi torrai a mudai. Difatis, studiendi s’esèmpiu de is Stadus de sa parti Sud de su mundu comenti s’Austràlia, chi ant giai passau atòngiu e ierru, e de su Rènniu Uniu puru, is studiosus funt ponendi a sa lerta in contu de unu perìgulu chi nàrant twindemia. Su fueddu benit de s’inglesu twins, est a nai fradis copiolus, e ddu impreant po inditai candu unu malàdiu tenit in su matessi tempus su Covid e s’influèntzia stagionali. Su Ministeru de sa saludi at registrau giai a metadi de su mesi de ladàmini una crèscia manna de s’impestu de Covid. Sa timoria es chi, cun su frius e sa spaniadura de s’influèntzia, crèsciant puru is malàdius de totus e duus is impestus impari.
Sa cosa podit essi perigulosa, ca medas de issus, pruschetotu cussus prus dèbilis, finint in spidali in terapia intensiva e tocat a ddus fai respirai in manera artificiali. Comenti giai biu in Austràlia e in àterus logus, po issus su perìgulu de si morri est artu meda.
Sa spaniadura de s’influèntzia de stagioni fiat un’arregordu, poita me is ùrtimus annus, cun s’apedèmia de Covid, s’influèntzia “normali” pariat sparèssia. Po sa beridadi s’influèntzia de stagioni ddoi est sèmpiri stètia, sceti chi sa spaniadura sua fiat prus dèbili gràtzias a is arrègulas contra a su Covid, comenti s’impreu de is mascareddas e is corantenas de is malàdius. Cun s’acabbu de custas arrègulas s’influèntzia est torrada a biaxai, a si spaniai e tocat a dda torrai a tenni in contu. Po custa arrexoni is spertus arrecumandant de torrai a fai is vacinus contra a s’influèntzia, ca me is ùrtimus duus annus sa genti iat smìtiu de ddus fai poita fiat prus de importu a fai cussus contra a su Covid.
Massimiliano Meloni
