Est prenu de candidados (o fortzis no) a s’eletzione de sa Regione de ocannu ki benet. Totus pensant ca ddoe at a èssere un’istampu de
prenare, ca su sistema sind’est sciusciende, e in capas Grillo no at a durare. E si movent ke musca amakiada pro su fragu de su màndigu
durche.
Duncas, tocat a ispiegare torra a custa bona gente ca a mese’e friàrgiu 2013 is eletziones generales ant donadu comente a resultadu ca est nàschida una fortza noa, e ki custa si nd’est pigada unu tèrtziu de is votantes. Custa fortza tenet unu caràtere nou de organizatzione, ki no esistiat prima. Tenet un’istategia de comunicatzione noa puru, ki murigrat totus is giogos connotos ainnantis ki arribesset custu avolotu. Pro sa primu borta, arrefutant sa televisione, is talk-show, sa sòlita minestra de su continuum polìticu-mediàticu ki at guvernadu s’Itàlia in is ùrtimos bint’annos.
Lassamus a una parte su restante. Su fatu est ca at a èssere difìtzile de fàere polìtica a s’antiga, dae como ainnantis. Prima de totu, ca sa
“retza”, ma subratotu cosa comente a is “retzas sotziales”, ant introdùsiu sa possibilidade de cuntierrare de polìtica e fàere cosa in
retza, e cosa polìtica. Intamis de dd’iscomunigare e de ddu timire, is Grillinos ant isboddicadu unu sistema chi cunsentit no petzi de
cuntierrare in retza, ma de generare puru detzisiones, candidaduras, òmines e fèminas polìticas de mandare in is istitutziones. Duncas,
novadores e modulares cunfroma a s’isboddicu autònomu de sa partecipatzione in retza.
Segundàriamente, nde ant leadu legitimidade a su giornalismu pagu lìberu e pagu autorèvole ki est sù italianu, contestende-ddu pròpiu in is formas prus populares suas. No isco ki est una cosa bona a su 100%, però seguramente est una cosa ki chistionat , ki narat cosa, e narat ca cuddos sunt logos non neutrales, e ki s’informatzione si podet fàere in àtera manera.
Sù ki is grillinos ant fatu, est istadu de donare isfogu a s’ispìridu de su tempus. Est custu livellu de partecipatzione ki est importante,
ancora de prus de kie at a èssere sa candidada o su candidadu pro sa Regione. Duncas, cando lìgio “su tziu o sa tzia ant a èssere candidados” mi nche penso, ma kie ddos at a sighire, a custos e a custos?
Alessandro Mongili
