Inserradu induna cosa americana meda ki est sa “Conference”, apo passadu bàtoro dies in San Diego, Califòrnia de giosso, a trinta kilòmetros de su Méssicu, de Tijuana. Su fatu est ca custa est gente organizada, e tando esistet totu un’indùstria de is Conferèntzias (“convegno”) e de is Convention, e tue dromes in sa posada acanta de unu Conference Center e inue b’at totu: is salas pro is plenàrias, is salas minores pro is “panels” temàticos (ki fiant prus de 300 custa borta), ristoranteddos e àteras amenidades. Ti nde pesas, papas, e ses giae imbukende in sa sala de s’acodru tuo. A inghìriu, sceti autostradas e unu ponte pedonale a subra de su Rio San Diego (unu riixeddu comente nche nde sunt meda in Sardigna), e, si ddu passas, arribas a unu Centru comerciale de lussu e a una metropolitana lèbia rexente, ma in mesu a su sartu.
Mancari sa cunferèntzia fessit interessante meda e duressit de mangianu a sero, unu collega italianu m’at propostu de nde pigare unu taxi e de torrare a su Campus. Infatis siat issu (bint’annos faet) ki deo (noe) semus istados “visiting” in s’Universidade de sa Califòrnia in San Diego (UCSD), una de is pagas universidades “de chirca” de custu Stadu, pùbrica ma fata pro èssere de livellu internatzionale. Un’universidade spetzializada in scièntzia, meixina e tecnologia, e duncas oberta a is istùdios sotziales nostros, ki si narant STS (Science and Technology Studies).
S’UCSD est istadu unu logu importante prenu de Nobel, ke a s’italianu Dulbecco puru, e su centru STS suo fiat mìticu puru, e infatis nch’ant traballadu siat Steven Shapin, su istòricu de s’iscièntzia su prus importante a pàrrere meu, sia Bruno Latour etotu. E insoma, pigadu de sa nostalgia de su campus, apo fatu vela pro duas oras. S’UCSD no est antiga meda, ma est innoe ki apo connotu su spantu de is bibliotecas universitàrias americanas, sempre obertas, ki ti nde podes pigare tue etotu is libros, agiudadu in totu de unu personale calificadu e bonu a ti sighire.
Ma sigomente deo no seo mai nostàlgicu, mentres s’amigu miu tropu puru, eus furriau pro custu campus (ki est mannu meda cun lìnnias de postalis internas) sighende duas maneras diversas. Issu, fiat totu “ca no agato prus nudda de su ki connoschia”, e deo a s’interis, ki fia entusiasta de totu sù ki fiat nou. In noe annos, custos ant costruidu, induna Universidade de su Stadu de sa Califòrnia, unascantas facultades (schools), dipartimentos, bibliotecas, tzilleris, mensas, spidales, comente ki fessit una tzitade noa.
Ovviamente, cun su collega miu, abituados a is universidades italianas, eus cumentzadu a frastimare sa sorte nostra cun fràsias a tipu “ma ti ddu imàginas, nosi bastàat su 20% de su dinare ki ant postu a innoe pro nosi sistemare, comente universidade”, “ma custa piscina est noa”, “e it’est custu Centru de Artes Visivas?” (unu palàtziu cun tres intradas in sa ruga, pro nàrrere), “ma càstia totu is istudentes de dònnia natzionalidade ki s’agatant”, e it’est custu Lounge? Sempre castiende a manca e a dereta e is cosas bècias o fiant pagas o no nche nde fiant prus, sustituidas cun cosa noa.
Andende-nosi-nde, indunu taxi, fiaus unu pagu arrevèscios e mudos, e apustis nosi seus postos a chistionare de àtera cosa. Fintzas a cando, su collega miu, ki est mancari nostalgicu, ma pagu bortas pessimista, calende de su taxi at nadu: “No, non ce la faremo mai. Mai”. Non nche dd’eus a fàere, seus tropu agoa. Issos, ant postu dinare, intelligèntzia, isperu, nosàteros ddos eus bogados.
Alessandro Mongili
