Ligende in “Sardinia Post” s’artìculu a pitzus de sa lìtera mandada dae su prof. Melis a sa redatzione, seo abarradu ispantadu de sa “lucida follia” cosa sua. Su chi narat podet èssere cunsideradu comente s’espressione de su fundamentu de s’idea chi is Sardos tenent de issos etotu, ma chi no si podet nàrrere abertamente. Narat infatis de noisàteros: “popolo di vittimisti parassiti che non hanno combinato alcunché di positivo nella Storia”. De seguru, s’idea est difùndia in Sardigna, bastat a pensare a s’espressione mentovada de Cappellacci kistionende a su telèfonu cun Verdini: “sa nexe est de is Sardos”, pro s’arretratesa nostra.
Poderosa est s’idea de acostare sù de èssere Sardos a s’impreu de sa limba sarda. Narat isse, intamis: “I miei genitori evitarono sempre di parlare in sardo con i tre figli. Perciò mi vanto di non saper parlare questa lingua da terra dei morti.” Ma custa est s’istòria de totu sa classe mèdia sarda de su XX sèculu, chi si bantat de faeddare un’italianu perfetu, e inue si riet (orribilmente, segundu su peus riflessu de “auto-razizatzione”, pro sighire a Taguieff in sa tipologia sua de su razismu) de s’acentu sardu e de is “sardismos” linguìsticos.
S’idea est poderosa ca est s’idea prima de is Sardos chi si kerent istesiare de issos etotu. E sa pràtica puru. Sa primu cosa est a iscarèssere su sardu, sa segunda est a faeddare un’italianu comente in is libros, sa tèrtzia est sà de camufare s’acentu puru (cun resultados de comicidade imboluntària de si nche mòrrere in is telegiornales de is tv locales, ma in is interventos de is parlamentares Chimbistellas puru, ultimamente). Infinis, comente in is Sardos autocolonizados, su cannone est furriadu contra de sa cosa prus profunda, culturalmente, de noisàteros: su nòmine, est a nàrrere noisàteros etotu, in sù ki seus. It’est custu Melis? It’est custu Murru? It’est custu Bakis? Proite no mi naro, ite nde isco, Ascanio Rossi, opuru Michael O’Brean? In is ùrtimas eletziones, amus iscobertu ca su secretàriu de su PD in Sardigna si narat Bakis Sìlviu, ma issu Bakis si ddu fiat cuadu. E comente a issu tantos. Kie tenet su coràgiu de nàrrere a is fìgios Efis, Antiogu, Gonare, Bakis? Nòmines antigos e bellos meda? Kie Antine? Totus preferrent Federica, opuru Diamante.
Deo no seo contra, ma su fatu est ki no ddoe at mai su nostru, su nostru est esclùdidu, e pro totus custa esclusione est normale. E custu est unu makiore. No est ki siat una moda, est su fatu ki una categoria de nòmines, proite ca sunt sardos e solu pro custu, sunt esclùdios (mancari narende ki sunt “lègios”, opuru “gàgios”, o atra cosa totu de cuntierrare cando naras a fìgiu tuo Thomas Murgia o is mentovados Marlon Brundu ec.). Duncas, si Melis est macu, su makìmine cosa sua no est unu makiore personale, est unu makiore sotziale, ki pertocat e ki cumpartzet a totus. Mancari no si potzat nàrrere. Est unu makiore ki narat de s’idea dominadora ki is Sardos tenent de issos etotu, forgiada in sa castiada colonizadora e dominadora de ìs ki nosi ant ocupadu, ke indun’ispigru. E ki nosi leat energia e boluntade meda, proite nosi faet bìere ke a unu “popolo di vittimisti parassiti che non hanno combinato alcunché di positivo nella Storia”, sighende is foeddos de custu simpaticone de su prof. Pietro Melis, ki tanti boliat a si nàrrere Auda comente a sa mama continentale sua.
