Su Consillu de is Ministrus at nau eja a una proposta de arreforma Costitutzionali po s’eligidura dereta de sa Ghia de su Guvernu. Sa proposta iat a mudai su sistema de guvernu chi teneus oi in Itàlia, chi iat a passai de Parlamentari a calchi cosa simbillanti a unu sistema Presidentziali.
Forma de guvernu bolit nai comenti est spaniau su poderi polìticu intra de is organus de su Stadu e pruschetotu calis funt is arrelatus intra de Guvernu e de Parlamentu.
In unu sistema de guvernu Parlamentari comenti su chi teneus oi in Itàlia, is citadinus votant sceti po su Parlamentu e su Presidenti de sa Repùbblica no est sa Ghia de su Guvernu. In unu sistema Presidentziali, comenti cussu chi ddoi at po esèmpiu in Amèrica, invècias is citadinus eligint siat su Parlamentu siat su Presidenti, chi est puru sa Ghia de su Guvernu.
In unu stadu democràticu custas diferèntzias tenint unu sentidu mannu, ca democràtzia bolit nai chi su poderi est de su pòpulu, duncas de is eligidoris chi votant. Si is citadinus eligint siat su Parlamentu, est a nai s’òrganu de su Stadu chi fait is leis, siat sa Ghia de su Guvernu, est a nai sa ghia de s’òrganu chi is leis ddas ponit in pràtiga, totu e duus arricint s’incàrrigu de chini tenit su poderi, duncas su pòpulu, ca in democratzia su poderi est de su pòpulu. Po custa arrexoni in Amèrica su Presidenti abarrat po totu is cuàturu annus de s’incàrrigu e su Parlamentu no ddu podit fai dimiti.
In Itàlia sa cosa est diferenti, ca su pòpulu eligit sceti su Parlamentu e duncas est sceti su Parlamentu chi arricit s’incàrrigu de su pòpulu. Su Parlamentu eligit su Presidenti de sa Repùbblica, chi no est sa Ghia de su Guvernu. Su Presidenti donat s’incàrrigu a sa Ghia de su Guvernu chi perou po intrai e abarrai in càrriga ddi tocat a tenni sa cunfiàntzia de su Parlamentu. Chi su Parlamentu ndi ddi tirat sa cunfiàntzia e ddu bolit fai dimiti ddu podit fai.
Custu sistema no est cosa sceti de s’Itàlia, ca funt de prus is Stadus cun unu sistema de guvernu Parlamentari chi cussus cun unu sistema Presidentziali. In Itàlia perou seus acostumaus a mudai is Ghias de su Guvernu soventi, prus de àterus Paisus. Una cosa chi podit incapitai est puru chi sa majoria chi bincit oi is eletzionis cras si mudat in un’àtera majoria e is partidus chi ariseru fiant a s’opositzioni, po mori de un’ammesturu passant a sa majoria.
Sa chistioni de su chi incapitat in Itàlia, si siat una cosa dannàrgia o nono, fait parti de meda tempus de sa debata polìtica. De seguru intra de is chi pensant chi siat una cosa dannàrgia ddoi est sa Presidenti de su Consillu e is partidus de majoria chi ant votau po mudai su sistema.
Ma cali mudadura, un’arreforma presidentziali? Tocat a nai chi is chi ant studiau sa proposta no difetant de fantasia, ca ant ammesturau totu, sistema Presidentziali e sistema Parlamentari, pensendi a una cosa chi no esistit in nisciunu àteru Paisu. Is citadinus iant a eligi siat su Parlamentu, siat sa Ghia de su Guvernu chi perou no iat a essi Presidenti de sa Repùbblica puru comenti incapitat me is sistemas de guvernu Presidentzialis. Su Presidenti de sa Repùbblica difatis iat a abarrai pustis de s’arreforma puru, elìgiu ancora de su Parlamentu, e iat a sighiri a essi sa figura de primori po s’unidadi natzionali. A sa Ghia de su Guvernu, sigumenti dd’iat a votai su pòpulu, no dd’iat a tocai a tenni sa cunfiàntzia de su Parlamentu po intrai e abarrai in càrriga. Sceti issu iat a podi decidi de si dimiti. Chi iat a incapitai custa cosa, a su Presidenti de sa Repùbblica dd’iat a tocai a incarrigai un’àtera Ghia de su Guvernu ma iat a podi donai s’incàrrigu o torra a sa persona chi s’est dimìtia o a un’àtera persona chi fait parti de sa majoria chi at bintu is eletzionis, elìgia issa puru. Mancu a custa Ghia de su Guvernu dd’iat a tocai a tenni sa cunfiàntzia de su Parlamentu e chi s’iat a dimiti s’iat a torrai a votai.
Iat a essi s’acabbu de Ghias de su Guvernu comenti su de Conte o de Draghi, chi no fiant elìgius in Parlamentu.
Po intrai in fortza a s’arreforma ddi tocat a mudai sa Costitutzioni, unu procedimentu grai chi est totu de portai a innantis e chi iat a podi acabbai puru cun unu referendum.
Massimiliano Meloni
